Protesta në Milot, pensionisti shtrihet në rrugë: Kam marrë bukë e raki me vete

Pasditen e kësaj të marte, mbështetësit e opozitës bllokuan 6 akse kryesore në të gjithë vendin, nga veriu në jug. Gazetari i Euronews Albania, Teodor Gjerga, raportoi për situatën në kryqëzimin e Milotit, që lidh veriun e Shqipërisë me Tiranën.

Vëmendjen në protestën e demokratëve në aksin Milot-Kashar e mori një pensionist, i cili kishte shtrirë veten në rrugë dhe kishte marrë me vete bukë e raki. Ai deklaroi se ishte pa shtëpi dhe se pensioni i tij ishte shumë i ulët për të përballuar jetesën.

“Sot jam pensionist, kam 6 vjet që kam vuajtur nga tërmeti. Jam demokrat i paharruar i Sali Berishës. Populli shqiptar është më keq se Ukraina, sepse Edi Rama e futi në vëllavrasje. Shqiptarët po ngatërrohen me njëri-tjetrin dhe po vrasin nga 20 veta. Ne do të bëjmë të pamundurën për t’i dalë zot Shqipërisë. Unë jam pa shtëpi; fëmijët e mi janë në punë të vetë. Jam pa lekë. Edi Rama e bëri pensionin tim sa 30 cigare, që do të thotë 1 cigare në ditë,” tha pensionisti.

Kujtojmë se mbështetësit e Partisë Demokratike dhe Partisë së Lirisë, janë pozicionuar në 6 akse kryesore të vendit duke paralizuar qarkullimin e automjeteve.

Aktivitetet do të zhvillohen nga ora 17:00 deri në orën 20:00 në autosradën “Tiranë–Durrës” pranë mbikalimit të Kamzës; “Durrës–Tiranë” pranë mbikalimit të Shkozetit; “Kashar–Milot” pranë kryqëzimit të Milotit; “Elbasan–Tiranë” te rrethrrotullimi i Bradasheshit; “Durrës–Fier” te rrethrrotullimi i Rrogozhinës; dhe “Levan–Tepelenë” te rrethrrotullimi i Levanit.

LEXONI GJITHASHTU:

• Noka fik makinën dhe bllokon rrugën: Zgjidhje politike për opozitën, ose nuk ndalemi
• “Ka vajtur ku s’mba më” – Opozita bllokon rrethrrotullimin e Levanit
• Trafik kilometrik në autostradën Tiranë-Durrës, bllokohet ambulanca