Trafik kilometrik në autostradën Tiranë-Durrës, bllokohet ambulanca

Bllokimi i rreth-rrotullimit të Shkozetit si pjesë e skenarit të protestës së opozitës për bllokimin e disa akseve kryesore në vend ka shkaktuar trafik kilometrik në autostradë Tiranë-Durrës.

Me qindra automjete janë bllokuar në trafik duke iu rënë borive vazhdimisht në shenjë proteste.

Mes automjeteve të bllokuara ishte edhe një autoambulancë, që ashtu si edhe automjetet e tjera nuk kishte asnjë alternativë për të kaluar rrugën dhe për të transportuar në spital pacientin që kishte brenda.

6 akse kryesore në vend do të jenë të paralizuara për shkak të protestës së opozitës që ka nisur në orën 17:00.

Konkretisht akset rrugore që janë bllokuar janë “Tiranë–Durrës”, pranë mbikalimit të Kamzës; “Durrës-Tiranë”, pranë mbikalimit të Shkozetit; “Kashar–Milot”, pranë kryqëzimit të Milotit; “Elbasan–Tiranë”, te rrethrrotullimi i Bradasheshit; “Durrës–Fier”, te rrethrrotullimi i Rrogozhinës dhe “Levan–Tepelenë”, te rrethrrotullimi i Levanit.

LEXONI GJITHASHTU:

• Deputetët e opozitës nisin protestën, parkojnë makinat në mes të rrugës
• A do të marrin pjesë në protestën e opozitës? Qytetarët të ndarë në mendime