Kryepeshkopi Janullatos thirrje besimtarëve ortodoksë: Votoni njerëz të pastër

Kryepeshkopi i Kishës Orthodhokse Autoqefale të Shqipërisë, Anastas Janullatos, i ka bërë thirrje sot gjatë një liturgjie besimtarëve orthodoksë, që të mos qëndrojnë indiferentë por të votojnë në zgjedhjet e 25 prillit. Kryepeshkopi Janullatos tha se është e rëndësishme që qytetarët të votojnë për njerëz të pastër.

“E kemi theksuar se Kisha jonë nuk merret me partitë politike dhe as nuk përzihet në çështjet politike që ka vendi. Ky është parimi i parë që kemi ndjekur. Por ka edhe një parim të dytë që është mjaft i rëndësishëm. Besimtarët ortodoksë, si qytetarë jemi përgjegjës të këtij vendi dhe kemi detyrimin për të votuar”, u shpreh kryepeshkopi.

Anastas Janullatos pavarësisht se theksoi se Kisha Orthodhokse nuk përfshihet në politikë, ai shtoi se besimtarët orthodhoksë nga ana tjetër kanë detyrim të ushtrojnë të drejtën e votës për të zgjedhur në krye të vendin njerëz të pastër.

“Nuk mund të themi jemi indiferentë. Kriteri përzgjedhës është mjaft i rëndësishëm. Zgjedhim njerëz të pastër që nuk vendosin përpara unin e tyre dhe pastaj na vendosin neve dhe kanë aftësinë për ta çuar vendin aty ku është përparimi. E përsëris e drejta për të votuar është një detyrim mjaft i rëndësishëm që kemi”, përfundoi kryepeshkopi.