Hetimi për të dhënat personale, SPAK kërkon materialet, gazetarët refuzojnë t’i dorëzojnë

Për të hetuar keqpërdorimin e të dhënave personale, nëpërmjet një vendimi të Gjykatës së Posaçme, SPAK kërkon që t’i dorëzohet i gjithë materiali me këto të dhëna nga portali Lapsi.al.

Në mbrojtje të burimit, drejtues të Lapsi nuk pranuan të jepnin të dhënat, ndërkohë SPAK e ka parë të nevojshme posedimin e saj, për hetimet që po kryhen.

Gazetari i Euronews Albania, Eni Ferhati tha SPAK i ka hapur rrugë tashmë, sekuestrimit të materialeve.

“Mbetet për t’u parë nëse drejtuesit e portalit do ta dorëzojnë vetë këtë database, apo do të jenë oficer të Policisë Gjyqësore së bashku me ekspertë të IT-së të cilët, në fakt, që në fillim të hetimit janë marrë dhe janë kontraktuar nga SPAK, që do të shkojnë në zyrat e portalit Lapsi.al për të sekuestruar dhe marrë në dorëzim këtë database,” – u shpreh Ferhati.

Gazetari tha se SPAK i është drejtuar me një kërkesë edhe AKEP-it, Autoritetit të Komunikimeve Elektronike dhe Postare për të bërë të mundur mbylljen e faqeve ku ishin ekspozuar këto të dhëna online.

Sipas burimeve të Euronews Albania, AKEP ka mundur të mbyllë një faqe ku qytetarët aksesonin të dhënat dhe merrnin vesh emrin e patronazhistit.

LEXONI GJITHASHTU:

• Përdorimi i të dhënave personale, Bushati: Kemi databazën tonë, kjo është puna që bëjmë
• Keqpërdorimi i të dhënave personale, KSHH: Subjektet të respektojnë privatësinë e çdo zgjedhësi
• Keqpërdorimi i të dhënave personale, Erida Skëndaj: Hetimi të jetë i plotë, i pavarur dhe objektiv