Nga porti i ri te zgjerimi i autostradës Tiranë-Durrës, investimet për vitin 2025

Qeveria shqiptare planifikon të shpenzojë 1.6 miliardë euro për infrastrukturën në vitin 2025. Investimet do të përfshijnë zgjerimin e autostradës Tiranë-Durrës, Korridorin 8, rindërtimin dhe ndërtimin e portit të ri në Porto Romano.

Sipas buxhetit për vitin 2025, investimet publike në infrastrukturë, rrugë, hekurudha dhe programe të tjera, do të marrin një vëmendje të shtuar, me një rritje prej 100 milionë eurosh në krahasim me vitin aktual. Brenda kësaj shume përfshihet edhe fondi për rindërtimin pas tërmetit të vitit 2019, pasi procesi për zëvendësimin e banesave të dëmtuara ende nuk ka përfunduar.

Totali i shpenzimeve parashikohet të arrijë në 6.2% të Prodhimit të Brendshëm Bruto (PBB), duke shënuar një nivel rekord krahasuar me vitet e kaluara.

Projektet që pritet të financohen nga ky buxhet përfshijnë zgjerimin e autostradës Tiranë-Durrës dhe Elbasan-Qafë Thanë, fillimin e punimeve për bypass-in e Elbasanit dhe segmentin Elbasan-Lekaj. Po ashtu, planifikohet të nisë ndërtimi i portit të ri në Porto Romano, i cili është një projekt afatgjatë dhe pritet të zgjasë përtej vitit 2025.

Në lidhje me kontratat e reja me partnerët publikë dhe privatë, në infrastrukturën rrugore pritet të financohen dy segmente të rëndësishme: Kashar-Lekaj dhe Lekaj-Fier.

LEXONI GJITHASHTU:

• Buxheti i shëndetësisë për 2025, Koçiu: Tejkalon 1 miliardë euro
• Buxheti për 2025-ën do të jetë 8.2 miliardë euro: Ulet borxhi, shtohet administrata