Ngec ‘motori’ franko-gjerman, problemet e brendshme dobësojnë dyshen lidere të BE

Motori franko-gjerman ka ngecur. Politikisht të dobët, liderët e dy vendeve do ta kenë më të vështirë të mbrojnë agjendën e tyre në arenën evropiane. Në Gjermani, koalicioni qeverisës u zhbë pas shkarkimit të ministrit të Financave javën e kaluar.

“Zgjedhjet e parakohshme në Francë gjatë verës e dobësuan ndjeshëm Macron dhe cenuan hapësirat e tij për manovra në bisedimet për borxhin e përbashkët evropian. Për shembull, kur u publikua programi i Mario Draghit, ai ishte në një pozitë shumë më të dobët nga sa ishte përpara zgjedhjeve franceze dhe atyre evropiane. E ngjashme është dhe situata e Scholz, që nuk është ftuar nga kryeministri polak Donald Tusk në një takim evropian, ku do të jenë Macron dhe kryeministri britanik Keir Starmer”, thotw Jacob Ross, nga Këshilli Gjerman për Marrëdhëniet me Jashtë.

Pas zgjedhjes së Donald Trump, kryeministri polak Tusk njoftoi se do të takohej me homologët evropianë për të diskutuar politikat e mbrojtjes.

Ndërsa liderët e shumë vendeve të NATO-s si Britania, Franca, shtetet baltike dhe ato skandinave janë ftuar në tryezë, kancelari gjerman Olaf Scholz nuk ka marrë një ftesë.

Kriza politike gjermane vjen në momente të vështira. Sapo të kthehet në Shtëpinë e Bardhë, Donald Trump mund të përpiqet të përçajë BE-në.

“Donald Trump ka të gjitha interesat për t’i bilateralizuar marrëdhëniet ndër-atlantike pasi ai e di se, nëse flet me Viktor Orban, Emmanuel Macron apo Olaf Scholz veç e veç, ai do të ketë shumë më tepër peshë në bisedimet për tarifat dhe ato për mbrojtjen evropiane nga sa do të kishte po t’i fliste një blloku me 27 shtete anëtare që mund të kenë një qëndrim të përbashkët. Kjo përbën një rrezik të madh”, shprehet Ross.

Kërcënimi për recesion në Gjermani mund ta amortizojë më tej motorin franko-gjerman. Gjermania, vendi me ekonominë më të madhe në BE, do të jetë e fokusuar tek fushata zgjedhore, në një kohë kur Trump kërcënon me tarifa produktet evropiane.

LEXONI GJITHASHTU:

• Macron, Scholz e Tusk, të shqetësuar për situatën në Gjeorgji
• Macron uron Trump për fitoren: Gati për të punuar së bashku