Atalanta 13 ndeshje pa humbje, vendi i dytë në kampionat

Kur flasim për një ekip kompakt, me pak shpenzime dhe një trajner me shumë ide, gjithmonë na vjen në mendje Atalanta e Gasperinit, e cila po kalon një formë të jashtëzakonshme në Itali. Bergamaskët, pasi mposhtën Romën të hënën, e shohin veten në vendin e dytë në kampionat, ndërsa kanë vendosur disa rekorde personale. Një prej tyre është ai i tetë fitoreve radhazi në të gjitha garat.

Përballë kryeqytetasve të Ranierit, bergamaskët triumfuan në transfertë me rezultatin 0-2. Ishte një duel i dominuar prej tyre, me pjesën e parë që nuk prodhoi gola. Në pjesën e dytë, De Roon zhbllokoi shifrat dhe ish-lojtari i Romës, Zaniolo, dyfishoi rezultatin, duke vulosur triumfin e dhjetë të Atalantës në Serie A këtë sezon.

Me këtë fitore, Atalanta ngjitet në vendin e dytë me 31 pikë, vetëm një pikë më pak se Napoli kryesues, ndërsa ndiqet nga Interi, Fiorentina dhe Lazio. Një statistikë interesante është se humbja e fundit e Gasperinit daton më 24 shtator, në përballjen ndaj Comos, e mbyllur me rezultatin 2-3. Që nga ai moment, Atalanta ka regjistruar vetëm dy barazime dhe njëmbëdhjetë fitore – një sukses i padiskutueshëm.

LEXONI GJITHASHTU:

• Goli i anulluar dhe penallti e humbur, çfarë ndodhi në derbin Tirana-Partizani
• Ernest Gjoka trajneri i ri i Skënderbeut