Ndahen 32 mln euro për fermerët dhe blegtorët, shpallen fituesit

14,800 fermerë dhe blegtorë do të përfitojnë nga skemat kombëtare të subvencioneve. Ministria e Bujqësisë ka shpallur fituesit, për të cilët janë në dispozicion 32 milionë euro.

Nga skema e subvencioneve në Bujqësi, këtë vit kanë përfituar fonde 14,800 fermerë. Lajmin e bën të ditur Ministria e Bujqësisë, e cila kishte pranuar në fazën e dytë 15,600 aplikime. Në 7 masat e miratuara për mbështetje, pjesa më e madhe i përket mbështetjes për blegtorinë, për tufën bazë të matrikuluar, të imta dhe gjedhin, me mbi 9 mijë fermerë.

Bletaria ka pasur gjithashtu interes shumë të lartë, ku janë kualifikuar 4,320 aplikime.

Ndërkohë, si një masë e futur për herë të parë, duket se interes të shtuar ka pasur edhe për bimët mjekësore, si dhe masa e mbështetjes për serat. Për masën e mbështetjes për fermat organike janë kualifikuar 169 aplikantë dhe për certifikimin global GAP, 48 aplikantë.

Skema e mbështetjes në bujqësi këtë vit përfshinte edhe subvencionin e naftës, ku përfituan më shumë se 50,000 fermerë.

Të dhënat tregojnë se qarku Fier kryeson për nga numri i aplikantëve dhe përfituesve, ndjekur nga Qarku i Korçës, Beratit, Shkodrës, Elbasanit dhe Vlorës.

Nga fondet në bujqësi, këtë vit kanë përfituar 77% e të gjithë fermerëve të regjistruar në vend. Shuma e përgjithshme e vënë në dispozicion për ta ishte 32 milionë euro.

LEXONI GJITHASHTU:

• Bujqësia nuk njeh më rritje, edhe blegtoria në krizë
• Fermerët e Maliqit në protestë, bllokojnë aksin Korçë-Pogradec: Nuk po ia dalim dot