Në kërkim për masakrën e Bradasheshit, GJKKO pezullon hetimet për Mikael Qosjan

Gjykata e Posaçme ka pezulluar me një vit gjyqin për Mikael Qosjan, i njohur edhe me mbiemrat Kamami dhe Stefo.

Është vlerësuar pezullimi i afateve të gjykimit, deri në marrjen dijeni të tij për procesin, pasi ende nuk është bërë ekzekutimi i urdhërit të gjykatës për arrestimin e tij.

Qosja i cili dyshohet se strehohet në Spanjë, është i dyshuar si një nga autorët e vrasjes së trefishtë në Dhjetor 2018 në Bradashesh të Elbasanit, ku u ekzekutuan Endrit Alibej, Arben Dylgjeri dhe shtetasi turk, Erdal Durunay.

I pari është vëllai i Erion Alibejt, të penduarit të drejtësisë, i arrestuar për disa krime që janë konsideruar si hakmarrje për këtë vrasje dhe dy të tjerët, rreth familjar i tyre.

Qosja u hetua dhe u shpall në kërkim fillimisht nga Prokuroria e Elbasanit në vitin 2021, hetime të cilat më pas treguan se ngjarja ishte kryer në bashkëpunim me persona të tjerë, si pjesë e një grupi kriminal.

Për këtë arsye, dosja u dërgua pranë Prokurorisë së Posaçme, e cila në shkurt të këtij viti, ka dorëzuar në Gjykatë kërkesën që ai të gjykohet për vrasje kundër dy ose më shumë personash, vjedhje me dhunë, armëmbajtje pa leje dhe pjesëmarrje në grup kriminal.

LEXONI GJITHASHTU:

• Asambleja e OKB miraton rezolutën për shkeljen e të drejtave të njeriut në Iran
• Qirinj dhe trëndafila para shkollës “Fan Noli”, mbahet protesta e pestë për Martinin