50-vite aktor, Nikolla Llambro vlerësohet me titull “Qytetar Nderi” në Gjirokastër

Aktori i mirënjohur gjirokastrit i skenës dhe ekranit, Nikolla Llambro është vlerësuar me titullin “Qytetar Nderi i Gjirokastrës”. Titulli i akorduar nga Këshilli Bashkiak iu dorëzua përgjatë një aktiviteti artistik i cili në mënyrë simbolike titullohej “Një jetë në dy kohë”.

Llambro është mjaft i njohur për artdashësit e qytetit të gurtë dhe më gjerë me interpretimin e rolit të patriotit Zeman Mashkullora në filmin ” Liri a vdekje”,filmin ” Koncert në vitin 1936″, etj. Në 50 vite karrierë ka realizuar një galeri të pasur rolesh në teatër dhe kinematografi mes të tjerash edhe interpretimin në seriale televizivë në Greqi Qipro e Gjermani.

“Kur merr një titull, një vlerësim, një çmim nuk ka sesi të mos emocionohesh sepse është një vlerësim, është një konsideratë që të bëhet nga instancat, miqtë, spektatorët, prandaj jam edhe i emocionuar, krenar dhe i lumtur”, tha aktori.

Për të ky vlerësim i shkon njëkohësish edhe aktorëve të vjetër të teatrit të Gjirokastrës të cilët kanë një kontribut të veçantë.

“Çdo vlerësim për aktorët në përgjithësi sidomos edhe për teatrin e Gjirokastrës është një vlerësim, një kënaqësi, një konsideratë dhe mendoj që Gjirokastra ka pak në këtë drejtim. Ka aktorë që duhen vlerësuar shumë më tepër të cilët e meritojnë të jenë në rangun e aktorëve që i kanë dhënë teatrit dhe spektatorit”, u shpreh Nikolla Llambro.

Trupa e teatrit profesionist “Zihni Sako” të Gjirokastrës ka një jetë kulturore 50 vjeçare ndërsa me vlerat artistike spikat në historikun e teatrit shqiptar.

LEXONI GJITHASHTU:

• “Çfarë i tha Martini vajzës time”, aktorja tregon si nisi konflikti te “Fan Noli”
• Rikthehet monumenti i patriotit Çerçiz Topulli në zonën muzeale të Gjirokastrës