Hyri me forcë brenda bankës në Korçë, kapet 38-vjeçari: Nuk mbaj mend, isha i dehur

Policia e Korçës ka identifikuar dhe arrestuar autorin që hyri me forcë brenda një banke të nivelit të dytë mbrëmjen e 21 dhjetorit.

38-vjeçari Valter Xhelillari, pasi hyri me forcë brenda bankës, qëndroi për disa minuta dhe u largua pa marrë asgjë.

Pas kontrolleve intensive që zgjatën 24 orë, Policia e Korçës bëri të mundur lokalizimin dhe kapjen e 38-vjeçarit.

Në momentin e arrestimit i ka bërë me dije policisë se nuk mbante mend asgjë se çfarë ka ndodhur ditën e ngjarjes pasi ka qenë nën efektin e alkoolit.

“Më datë 21.12.2024, rreth orës 22:05, 38-vjeçari ka hyrë me forcë në ambientet e një banke të nivelit të dytë, ku ka qëndruar për disa sekonda dhe është larguar menjëherë sapo ka konstatuar shërbimet e Policisë, pa marrë asgjë”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

LEXONI GJITHASHTU:

• Korçë, një person tenton të hyjë me forcë në një bankë të nivelit të dytë
• “Hajduti” korçar live në TikTok pasi hyn në bankë me një të shtyrë të derës