Kërkoi lirimin, shtyhet seanca për Safet Gjicin: Mungonte 1 përgjigje nga ekspertët

Në Gjykatën e Shkallës së Parë të Juridiksionit të Përgjithshëm në Elbasan, u zhvillua këtë të hënë seanca për ish-kryebashkiakun e Kukësit, Safet Gjici, i cili ka kërkuar të vuajë pjesën e mbetur të dënimit në shtëpi.

Seanca u shty për më datë 31 janar 2025, në orën 10:00, pasi ekspertët e mjekësisë ligjore nuk iu përgjigjën të gjitha pyetjeve të prokurorit.

Vetë Gjici nuk ishte i pranishëm në seancë, por përfaqësohej aty nga avokati mbrojtës Markeljan Jança. Po ashtu, organi i akuzës ishte i përfaqësuar nga prokurori Ledian Tema. Ekspertët mjekoligjorë nuk u paraqitën, por akti i ekspertimit u dorëzua përmes postës.

Sipas aktit të ekspertimit, ekspertët mjekoligjorë nuk i janë përgjigjur pyetjes nr. 10 të gjykatës, e cila kërkonte informacion mbi terapinë efektive për kërkuesin dhe mundësinë e trajtimit të tij në institucionin aktual.

Për këtë arsye, gjykata vendosi që akti i ekspertimit të plotësohet me përgjigjen për këtë pyetje.

Gjykata kërkoi gjithashtu që Shërbimi i Provës të hartojë një Plan Individual për kërkuesin, me objekt “Qëndrim në Shtëpi”, dhe ta dorëzojë brenda një periudhe dy javore.

Në përfundim, gjykata vendosi që seanca e ardhshme të mbahet më datën 31 janar 2025, ora 10:00, për të mundësuar kohën e nevojshme për përgatitjen e planit dhe për të marrë përgjigjet e ekspertëve mjekoligjorë.

LEXONI GJITHASHTU:

• Shtyhet seanca për Safet Gjicin, shkak mungesa e një anëtari të trupit gjykues
• Avokati i Safet Gjicit për Review: Është i pafajshëm, nuk ka patur projekt për qentë