Komplikacionet nga gripi, Nako: 100 pacientë çdo ditë referohen nga mjeku i familjes

Më shumë se 12 mijë persona janë paraqitur në javën e fundit pranë mjekëve të familjes në poliklinika apo në urgjencat e spitaleve në të gjithë vendin, si pasojë e prekjes nga gripi apo viroza të stinës.

Numri më i madh i vizitave është regjistruar në kryeqytet. Mjekët apelojnë që të bëhet kujdes, pasi gripi është një infeksion viral që bën komplikacione.

Vetëm gjatë një dite në shërbimin e dispanserisë në kryeqytet paraqiten rreth 100 pacientë, që kanë nevojë për trajtim të specializuar.

“Këto bëjnë infeksione të rrugëve respiratore, bronkite, sinozite deri në pneumoni, mund të jenë 10-15% komplikacione të rënda, me pneumoni apo bronkopneumoni, ndërsa pjesa e bronkiteve janë 50-60%”, thotë Entela Nako, drejtore e Dispanserisë.

Janë mjekët e familjes ata që i referojnë pacientët e tyre për tek mjeku specialist, pasi shohin që brenda 1 javë sëmundja ka avancuar dhe nuk po përmirësohet.

“Zakonisht janë mosha mbi 65 vjeç, të sëmurë që kanë sëmundje bashkëshoqëruese, diabet, sëmundje kardiake, apo ata që marrin imunoterapi”, shprehet mjekja.

Ekspertët thonë se shumica e rasteve që bëjnë komplikacione të rënda nuk e kanë aplikuar vaksinën kundër gripit. Ata thonë se kategoritë e riskuara duhet të vaksinohen pasi gripi mund të jetë dhe fatal për ta.