Trafikonin drogë në Gjermani, SPAK dërgon për gjykim Islam Sefën dhe tre të tjerë

Prokuroria e Posaçme kundër Korrupsionit dhe Krimit të Organizuar ka përfunduar hetimet dhe ka dërguar për gjykim Islam Sefën, i cili u arrestua me 3 korrik të vitit 2024 pranë ambineteve të kësaj strukture.

Bashkë me Islam Sefën do të gjykohen dhe tre persona të tjerë; Hajdar Lala alias Xaka, alias Sefa; Vidjan Baroka dhe Durim Xaka.

Sipas njoftimit të SPAK; “Nga tërësia e hetimeve të kryera, bashkëpunimi gjermano-shqiptar në luftën kundër krimit të organizuar dhe duke u bazuar tek komunikimet e zhvilluara në platformat e enkriptuara, EncroChat dhe SkyEcc, janë administruar prova në kuadër të ndihmës së ndërsjellët juridike në fushën penale, të cilat, kanë identifikuar 12 persona, 8 prej të cilëve janë shtetas shqiptarë dhe 4 shtetas gjermanë, të përfshirë në aktivitetin e paligjshëm kriminal të trafikimit të narkotikëve.

“Sasia e lëndës narkotike sigurohej kryesisht nga Shqipëria dhe Spanja dhe pasi futej në territorin gjerman ku tregtohej në rajonin Wolfsburg-ut, Magdeburg-ut, si edhe në shtete të tjera të Bashkimit Evropian”.

“Nga hetimet ka rezultuar dhe është provuar se të pandehurit dhe bashkëpunëtorët e tyre gjatë viteve 2020-2021 kanë trafikuar në Gjermani, sasinë prej mëse 1000 kg lëndë narkotike e llojit marijuanë, vlera e së cilës arrin shumën e 3,374,400 (tremilionë e treqindë e shtatëdhjetë mijë e katërqind) euro” thuhet në njoftimin e SPAK.

“Nga aktet e administruara për këtë procedim penal, të pandehurit, Islam Sefa (alias Xaka), dhe Hajdar Lala (alias Sefa, alias Xaka) kanë pasur rol drejtues dhe financues në veprimtarinë e paligjshme kriminale të trafikimi të narkotikëve, ndërsa të pandehurit, Vidjan Baroka dhe Durim Xaka dhe bashkëpunëtorët e tyre të proceduar dhe dënuar në Gjermani, kanë pasur rol ndihmues” thuhet në njoftimin e shpërndarë nga SPAK.

• VIDEO| Arrestohet 100 metra nga SPAK Islam Sefa, pamjet kur BKH futet në lokal
• Arrestohet në Shkodër 36-vjeçari i kërkuar në Spanjë për trafik droge