Zjarr në një bllok banesash në Pogradec, Policia evakuon banorët

Një zjarr i fuqishëm ka shpërthyer në një shtëpi në qytetin e Pogradec, në lagjen 4, gjatë orëve të paradites së sotme. Flakët janë përhapur shpejt dhe kanë përfshirë një ndërtesë kolektive, duke shkaktuar frikë dhe panik mes banorëve.

Menjëherë pas njoftimit për ngjarjen, zjarrfikësit kanë mbërritur në vendngjarje dhe po punojnë intensivisht për të shuar flakët dhe për të parandaluar përhapjen e zjarrit në banesa të tjera. Fatmirësisht, të gjithë anëtarët e familjes që jetonin në shtëpinë e prekur janë evakuuar në kohë dhe nuk ka pasur të lënduar.

Për shkak të intensitetit të zjarrit, autoritetet kanë ndërhyrë për të evakuuar banorët e zonës përreth, ndërkohë që forcat e policisë janë angazhuar për të siguruar territorin dhe për të shmangur çdo rrezik të mundshëm për jetën e qytetarëve.

Shkaku i zjarrit mbetet ende i paqartë dhe hetimet janë duke vazhduar për të sqaruar rrethanat e ngjarjes.