Sekuestrohen në Durrës 670 mijë litra naftë kontrabandë nga Tunizia, 3 të arrestuar

Tre persona janë arrestuar ndërsa 5 të tjerë janë proceduar në gjendje të lirë ps një operacioni policor të koduar “Ari i zi”. Në këtë operacion u sekuestruan 670 000 litra naftë e dyshuar e kontrabanduar nga Tunizia.

Gjithashtu është sekuestruar anija me të cilën ishte kontrabanduar nafta, 14 dokumente identifikimi dhe dokumente për lundrim, 10 celularë dhe dokumente të tjera që do t’i shërbejnë hetimit për rastin.

Ndërkohë policia ka njoftuar se janë identifikuar 2 organizatorët e këtij rasti dhe se po punohet intensivisht për lokalizimin dhe kapjen e tyre.

Tre personat e arrestuar janë: Mohammd Kahilah, Eneo Cano dhe Sushil Vema.

Njoftimi i policisë

Si rezultat i punës së inteligjencës policore dhe bashkëpunimit të ngushtë ndërmjet Seksionit për Hetimin e Krimeve Ekonomike dhe Financiare të DVP Durrës, Antikontrabandës dhe Seksionit për Mbështetjen Operacionale të Hetimit të DVP Durrës, Drejtorisë për Hetimin e Krimeve Ekonomike dhe Financiare të DPPSh-së, Drejtorisë së Kufirit dhe Migracionit Durrës, Guardia di Finanza Durrës, Degës së Doganës Durrës, u organizua dhe u finalizua operacioni policor i koduar “Ari i zi”.

Gjatë operacionit u arrestuan në flagrancë shtetasi sirian M. K., 45 vjeç, me detyrë kapiten i anijes, shtetasi shqiptar E. C., 43 vjeç, me detyrë marinar i anijes, si dhe shtetasi indian S. V., 42 vjeç, me detyrë oficer i parë i anijes. Gjithashtu, u identifikuan dhe u shpallën në kërkim organizatorët e dyshuar të këtij rasti, shtetasit E. S., 59 vjeç, banues në Durrës, dhe F. B., 29 vjeç, banues në Zvicër.

Më tej, gjatë këtij operacioni, u referuan materialet në Prokurori, ku nisi procedimi në gjendje të lirë për 5 pjesëtarë të tjerë të ekuipazhit të anijes, përgjegjës për mirëmbajtjen e mjetit.

Nga kontrolle në anije, në balastrat që shërbejnë për balancimin e mjetit, u gjetën përkatësisht 670 000 litra naftë e dyshuar e kontrabanduar nga Tunizia.

LEXONI GJITHASHTU:

• Aksion në Maqedoninë e Veriut për makina të kontrabanduara nga vendet e BE-së
• Kompani false në Shqipëri, Greqia shkatërron rrjetin e kontrabandës së alkoolikeve