“LDK si një mizë”, përplasja Abdixhiku-Albin Kurti: Ne nuk zhytemi në moçal…

Kandidati për kryeministër nga Lidhja Demokratike e Kosovës, Lumir Abdixhiku i ka kërkuar kryeministrit aktual të Kosovës, Albin Kurtit, një ballafaqim publik për “të matur idetë për të ardhmen”.

Kjo deklaratë e Abdixhikut, erdhi pasi që në fushatë, kryeministri Kurti ka përmendur opozitën, duke thënë se “do të kalben në opozitë” e duke i quajtur “miza”.

Pas prezantimit të projekteve të kryeqytetit, Abdixhiku i pyetur se si i vlerëson këto deklarata, u shpreh se LDK-ja nuk zhytet në “moçalin e madh të pështymave”.

Ai, shtoi se në këtë fushatë do të fokusohet vetëm në prezantimin e punës së ardhshme të Kosovës.

“Nuk jemi për tu sharë e përçarë e për tu zhytur në moçalin e madh të pështymave. Jemi për të prezantuar punën e ardhme të Republikës së Kosovës sepse na duhet tu shpjegojmë qytetarëve tanë se çka qëndrojmë. Kryeministrin në ikje e ftoj edhe në ballafaqim publik le të masim idetë për të ardhmen. Për mu sharë i kemi disa të tjerë, por nuk e kam ndërmend në këtë fushatë me u sha”, tha Abdixhiku.

Abdixhiku sot së bashku me kryetarin e Prishtinës Përparim Rama kanë nënshkruar zotimet për investimet prej 1.5 miliardë euro për kryeqytetin.

LEXONI GJITHASHTU:

• A do garojnë Berisha dhe Meta në zgjedhje? Biseda jashtë kamerave e Ramës dhe Kurtit
• Nënkoloneli apel shoferëve nga Shqipëria: Në Kosovë merrni goma dimërore e zinxhirë