Rama në Abu Dhabi: Nënshkruajmë marrëveshjen me Italinë për kabllot nënujorë

Kryeministri i Shqipërisë Edi Rama ndodhet për një vizitë zyrtare në Abu Dabi. Vizita e tij ishte në kuadër në kuadër të pjesëmarrjes në eventet e Javës së Qëndrueshmërisë Abu-Dhabi 2025.

Në fjalimin e mbajtur, Rama theksoi se bashkëpunimi me Emiratet e Bashkuara Arabe në sektorin energjitik, tregon një hap të rëndësishëm për Shqipërinë por dhe Evropën.

“Është një nder të marr fjalën për të prezantuar atë që po formëson të ardhmen e Shqipërisë, konkretisht energjia e pastër dhe forcimi i partneriteve kombëtare, specifikisht me Emiratet e Bashkuara Arabe.

Falë Emirateve të Bashkuara Arabe, ne po diversifikojmë dhe transformojmë sektorin energjitik shqiptar. Tani prodhimi i energjisë elektrike në Shqipëri, është 100% nga burimet e ripërtëritshme. Përqindja e energjisë së përtëritshme e Shqipërisë është 44%, kjo e bën atë pjesë të vendeve europiane dhe skandinave”, ka thënë Rama.

Ndërkaq, kryeministri ka folur për një marrëveshje strategjike me Italinë dhe Emiratet e Bashkuara Arabe, që pritet të nënshkruhet lidhur me kabllot nënujore.

“Shumë shpejt do të nënshkruajmë një marrëveshje strategjike së bashku me Italinë dhe Emiratet e Bashkuara Arabe për kabllot nënujore. Ky është një instrument shumë i rëndësishëm për transmetimin e energjisë së përtëritshme nga Shqipëria në Itali por dhe për të rritur kapacitetin e Shqipërisë si një lojtar kyç në rajon mbështetur në prodhimin e saj.

Ky është një hap i rëndësishëm për rajonin dhe për Evropën gjë që nuk do të kishte qenë i mundur pa bashkëpunimin me Emiratet e Bashkuara Arabe”, theksoi kryeministri.

Në përmbyllje të fjalimit të tij, Edi Rama i dha rëndësi bashkëpunimeve të tilla, të cilat e afrojnë më shumë Shqipërinë drejt anëtarësimit në BE.

“Partneriteti i Shqipërisë me Emiratet e Bashkuara Arabe në sektorin energjitik , është i rëndësishëm për një rajon ku shumë luftëra i kanë dhënë formë së shkuarës tonë. Bashkëpunimi për të qenë pjesë e familjes së madhe evropiane, duhet mbështetur me nisma konkrete për të kapërcyer të shkuarën”, tha kryeministri Edi Rama.

LEXONI GJITHASHTU:

• “Musk, një rival për mua?”- Rama surprizon Melonin për ditëlindje në Abu Dhabi
• “Urat e reja”, Rama: Zhvillimi i pronës publike sipas modelit italian dhe spanjoll