Arratisja e 2 personave nga Policia e Elbasanit, arrestohet 1 efektiv, pezullohen 3

Në kuadër të veprimeve hetimore lidhur me arratisjen e dy të arrestuarëve nga Komisariati i Policisë Elbasan, AMP ka arrestuar inspektorin Dhimitër Doka, trupë shërbimi vend roje në Komisariatin e Policisë Elbasan, për shpërdorim të detyrës, ndërsa janë proceduar në gjendje të lirë edhe inspektorët Avni Hamzallari dhe Azem Bardhi, për të njëjtën vepër penale.

Po ashtu janë pezulluar 3 efektivë të tjerë pas vendimit të Gjykatës së Shkallës së Parë të Juridiksionit të Përgjithshëm Elbasan e cila vendosi caktimin e masës së sigurisë:

“Pezullim i ushtrimit të një detyre a një shërbimi publik” për punonjësit e policisë, të cilët dyshohet se nuk kanë ndërmarrë masat e nevojshme për të parandaluar arratisjen e shtetasve Nazmi Liçi dhe Ervis Peqini të cilët ishin arrestuar për vjedhje me dhunë dhe ndodheshin në dhomat e sigurisë të Komisariatit të Elbasanit.

Punonjësit e pezulluar janë:

➡️ N/Komisar Theofan Telo, Specialist për rendin në Komisariatin e Policisë Elbasan

➡️ Inspektor Andeta Liçi, Ndihmës Specialiste në Zyrën e Informacionit, Komisariati i Policisë Elbasan

➡️ Inspektor Avni Bahja, Përgjegjës i dhomave të sigurisë pranë DVP Elbasan

AMP ka theksuar se hetimet vijojnë për të zbardhur përgjegjësitë e punonjësve të tjerë të mundshëm të përfshirë në këtë ngjarje.

LEXONI GJITHASHTU:

• Dy të paraburgosur për vjedhje arratisen nga komisariati, kapet njëri
• Operatori i ekipit të futbollit të Elbasanit, rrëfehet në “Real People” Dash Qemali