Ekipet çerekfinaliste të Kupës së Shqipërisë, në ditët në vijim hidhet shorti

Pretendentët për fitimin e Kupës së Shqipërisë nuk kanë zhgënjyer në fazën e 1/8-ave, ku skuadrat si Partizani, Egnatia, Dinamo apo Elbasani kanë avancuar më tej, duke prekur çerekfinalet. Ajo që bie në sy është se asnjë nga ekipet e Kategorisë së Parë nuk kaloi mes 8 më të mirave, ku Besa u mund nga Vllaznia, Vora nga Skënderbeu, Kastrioti nga Egnatia, Erzeni nga Dinamo dhe Apolonia nga Partizani.

Në “Arenën e Demave”, të kuqve u mjaftoi dopieta e Keko për të kaluar më tej, me Apoloninë që ishte e pafuqishme për t’u shfaqur rrezikshëm. Egnatia po ashtu bindi ndaj Kastriotit, të cilit i shënoi 4 herë, teksa edhe më i thellë ishte rezultati në Dinamo-Erzeni, ku nëndetësja shënoi 6 herë në portën e shijakasve, me këta të fundit që golin e vetëm e regjistruan falë autogolit të lojtarit kundërshtar.

Tirana u mposht nga Bylis, e padyshim mund të cilësohet rezultati surprizë, ndërsa Laçi fitoi pastër ndaj Kukësit. Skënderbeu ia doli minimalisht ndaj Vorës, ndërsa Elbasani doli me kokën lart nga transferta e Teutës. Në “Loro Boriçi”, Vllaznia fitoi në shtesë, me 1 gol që kishte vlerën e kualifikimit.

LEXONI GJITHASHTU:

• Besa gjen trajnerin e ri, pritet të emërohet “ishi” i rivalëve
• Egnatia mund Kukësin dhe fiton për herë të parë në histori Superkupën e Shqipërisë!