Gjirokastër| AMP arreston një punonjës policie dhe pezullon dy të tjerë

Agjencia e Mbikëqyrjes Policore (Rajoni Vlorë – Gjirokastër), ka arrestuar një punonjës policie dhe ka pezulluar dy të tjerë për shkelje ligjore.

Inspektori me iniciale S. K., punonjës i policisë kufitare në Drejtorinë Vendore për Kufirin dhe Migracionin (DVKM) Gjirokastër, është arrestuar për veprat penale “Shkelja e rregullave të qarkullimit rrugor” dhe “Drejtimi i automjeteve në mënyrë të parregullt”.

Inspektori, duke drejtuar një automjet tip “Seat”, është përplasur me një makinë tjetër, duke shkaktuar dëmtime te pasagjerët e mjetit tjetër, të cilët fatmirësisht, pas marrjes së ndihmës së parë mjekësore, ndodhen jashtë rrezikut për jetën. Testi i alkoolit tregoi se Inspektori ishte nën efektin e pijeve alkoolike në momentin e aksidentit.

Ndërkohë, Agjencia ka pezulluar nga detyra edhe dy punonjës të tjerë të policisë, Inspektorët me iniciale L. K. dhe O. B., që shërbenin si Ndihmës Kontrollorë në Pikën e Kalimit Kufitar Kakavijë. Masat e pezullimit janë ekzekutuar sipas vendimit të Gjykatës në Gjirokastër, me akuzën “Shpërdorim i detyrës”.

Hetimet kanë zbuluar se dy inspektorët dyshohen për lejimin e kalimit të një automjeti të markës “Toyota Avensis” në territorin shqiptar pa dokumentacionin e nevojshëm, duke shmangur procedurat ligjore dhe duke lehtësuar trafikimin.

Agjencia e Mbikëqyrjes Policore vijon hetimet për zbardhjen e plotë të rasteve dhe për vënien para përgjegjësisë ligjore të personave të përfshirë.

LEXONI GJITHASHTU:

• Sekuestrohen 260 kg kanabis në dy kampera luksoz në Vlorë, arrestohen 4 rumunët
• Arratisja e 2 personave nga Policia e Elbasanit, arrestohet 1 efektiv, pezullohen 3