‘Ethet’ e primareve në PD, nisin dorëheqjet dhe kundërshtimet ndaj procesit

Brenda javës së parë të shkurtit Partia Demokratike do të zhvilloj procesin e primareve për të përzgjedhur kandidatët për zgjedhjet e përgjithshme të 11 majit.

Menjëherë pas një udhëzimi të shpërndarë nga Sali Berisha për kryetarët e degëve që do duan të kandidojnë për deputet që të dorëhiqen nga pozicioni që kanë në parti, kanë filluar të shfaqen pakënaqësitë dhe debatet e para.

Ndër të parët që reagoi në rrjetet sociale, duke shfaqur pakënaqësi ishte drejtuesi politik i Vlorës, Bujar Leskaj.

“Në këndvështrim tim Kryetarët e Degëve të Partisë Demokratike nuk kanë pse të dorëhiqen nga pozicioni, të cilën e kanë fituar e mbajtur me votën e anëtarësisë së Partisë Demokratike, si votëbesim e proces i mirëfilltë primaresh. Çdo ndryshim i këtij parimi do të përbënte një shkelje të frymës demokratike që Partia Demokratike përfaqëson”, ka shkruar Bujar Leskaj.

Por Leskaj, nuk është i vetmi që ka një qëndrim kritik për këtë proces dhe mënyrën se si ai pritet të bëhet, pasi edhe drejtues të tjerë të lartë të PD kanë pakënaqësi.

Sakaq, nga ana tjetër këtë të premte nisën edhe dorëheqjet e para të kryetarëve të degëve që aspirojnë për të garuar në primare. E para që e njoftoi largimin nga pozicioni në parti ishte Manjola Nikollo, kryetare e degës së Sarandës, ndërsa në ditët e ardhshme janë edhe disa kryetarë të tjerë degësh që pritet të dorëhiqen nga pozicioni në parti, pasi kanë shprehur edhe publikisht aspiratën për të kandiduar.

LEXONI GJITHASHTU:

• Bujar Leskaj kundër propozimit të PD për Primaret: Kryetarët e degëve janë votuar
• Berisha do paraqitet në SPAK, PD lajmëron sërish protestë