Çështja e “doping-ut”, italiani që fitoi Australian Open rrezikon pezullimin

Jannik Sinner mund ta humbasë shkëlqimin e tij, në rast se gjykata vendos ta dënojë për çështjen e mëhershme të dopingut, ku italiani ka rezultuar dy herë pozitiv. Seanca dëgjimore zhvillohet në muajin prill.

Për të dytin vit radhazi triumfoi në Australian Open, në një garë ku dominoi nga fillimi e deri në finalen e madhe, ku i rrëmbeu trofeun gjermanit Zverev. Jannik Sinner është tenisti më në formë në botë, por jo gjithçka mund të ndryshojë, dhe këtë gjë e ka në dorë gjykata. Pas triumfit në kompeticionin e mbajtur në Australi kanë shpërthyer thashethemet se në prill, kur dhe zhvillohet seanca gjyqësore e tij, 23-vjeçari mund të marrë një dënim që do ta përjashtojë nga gara për 2 vite.

Kjo është mundësia e vetme për të ndalur shkëlqimin e tij, i cili duket se po parakalon edhe Carlos Alcaraz, ndërsa 2024 mund të konsiderohet viti i italianit. Thuajse 1 vit më parë, Jannik Sinner rezultoi pozitiv dy herë në testet antidoping pasi në organizmin e tij u konstatua prania e steroidit clostebol, por më pas u shpall i pafajshëm.

Forma shumë e mirë e tij, me sukses në 21 ndeshje radhazi, ka bërë që sërish hetuesit e çështjes t’i rikthehen Sinner, ndërsa do të japin një vendim përfundimtar për të në 16-17 prill. Kujtojmë se në momentet kur rezultoi pozitiv, 23-vjeçari pohoi se substanca ishte kaluar në organizëm nëpërmjet një spraj të aplikuar në plagën e tij, por ende llogaritë me drejtësinë nuk janë mbyllur.