Ndërprerja e fondeve amerikane, reagon SPAK: Jemi institucion i pavarur

Prokuroria e Posaçme kundër Krimit të Organizuar dhe Korrupsionit ka reaguar për herë të parë pas njoftimit të ambasadës amerikane për ndërprerjen e fondeve për institucionet shqiptare.

Në një deklaratë për mediat, SPAK bën me dije se është informuar për Urdhrin Ekzekutiv të Qeverisë së Shteteve të Bashkuara, i cili ndalon implementimin e programeve të asistencës ndërkombëtare.

SPAK thekson se është një institucion i pavarur, i cili financohet tërësisht nga buxheti i shtetit shqiptar, bazuar në ligjin nr. 115/2024 “Për menaxhimin e sistemit buxhetor të Republikës së Shqipërisë”.

Megjitahtë, SPAK vlerëson mbështetjen e partnerëve ndërkombëtarë si jetike për forcimin e punës së institucionit, veçanërisht në trajnimet profesionale, vizitat studimore, pajisjet teknike dhe sistemin e menaxhimit të çështjeve.

“Jemi informuar për Urdhrin Ekzekutiv të Qeverisë së Shteteve të Bashkuara për të ndaluar implementimin e programeve të asistencës ndërkombëtare.

SPAK është një institucion i pavarur, i cili mbështetet tërësisht në buxhetin e shtetit. Ligji 115 i vitit 2024 “Për menaxhimin e sistemit buxhetor të Republikës së Shqipërisë” parashikon edhe buxhetin e miratuar për Strukturën e Posaçme kundër Korrupsionit dhe Krimit të Organizuar për vitin 2025.

Prokuroria e Posaçme dhe Byroja Kombëtare e Hetimit (BKH), prej krijimit kanë pasur mbështetjen e partnerëve ndërkombëtare, përfshirë Shtetet e Bashkuara të Amerikës, të cilët  kanë dhënë kontributin e tyre përmes misioneve: OPDAT, ICITAP, DEA, FBI.

Mbështetja e tyre është tejet e rëndësishme për fuqizimin e punës së SPAK dhe konsiston kryesisht në trajnime, vizita studimore, pajisje të ndryshme teknike dhe sistemin e menaxhimit të çështjeve”, thuhet në njoftimin e SPAK.

LEXONI GJITHASHTU:

• Ambasada e SHBA reagon për Euronews Albania: Pse i pezulluam fondet e ndihmës
• Ambasada e SHBA njofton ndërprerjen e fondeve për institucionet shqiptare