Opozita mban sot protestën kombëtare: Blindohet kryeministria, skenarët e tubimit

Duke nisur prej orës 17:00, pritet të fillojë protesta e opozitës në qendër të Tiranës, përballë Kryeministrisë. Ky është tubimi i parë kombëtar i opozitës shqiptare, që zhvillohet vetëm pak javë para nisjes zyrtare të fushatës elektorale për zgjedhjet e 11 majit. Protesta është lajmëruar si vijim i aksionit të mosbindjes civile nga ana e Partisë Demokratike, në një kohë kur prej disa javësh vijon procesi i regjistrimit të diasporës, nga e cila opozita shpreson të vijë një votë proteste.

Burime nga selia blu flasin për këtë protestë si një tubim që do të jetë një tregues force për Partinë Demokratike në prag të nisjes së fushatës për zgjedhjet e 11 majit.

Këtë herë, sipas asaj që është planifikuar, protestuesit do të grumbullohen në bulevard sipas një ndarje të bërë nga organizimi i partisë, ndërsa disa dhjetëra të rinj të FRPD do të shoqërojnë Sali Berishën bashkë me një pjesë tjetër të lidershipit të partisë në marshimin nga selia blu drejt bulevardit, përballë Kryeministrisë.

Ndërkohë, nga ana tjetër, Policia e Shtetit mësohet se ka hartuar një plan masash për të menaxhuar protestën, duke nisur me bllokimin e disa prej akseve që të çojnë drejt bulevardit. Bëhet me dije se forcat e angazhuara për mbarëvajtjen e protestës do të jenë rreth 1 mijë, ndërsa policia ka marrë masa edhe nëse protesta do të spostohet në pjesë të tjera të kryeqytetit.