Një person sulmohet me sende të forta nga ish-dhëndri në mes të Prishtinës

Një person ka mbetur i lënduar pas një sulmi fizik që ka ndodhur pasditen e së premtes në Prishtinë.

Sipas Policisë së Kosovës, viktima, një mashkull kosovar, ishte duke u kthyer në shtëpi kur është sulmuar fizikisht me mjete të forta nga ish-dhëndri i tij. Si pasojë e goditjeve, viktima ka pësuar lëndime dhe është dërguar për trajtim mjekësor në Qendrën Klinike Universitare të Kosovës (QKUK).

Pas kryerjes së sulmit, i dyshuari është larguar me veturë nga vendi i ngjarjes dhe aktualisht gjendet në arrati. Policia e Kosovës ka dalë në vendin e ngjarjes dhe ka nisur hetimet, ndërsa për rastin është njoftuar edhe prokurori i shtetit.

Autoritetet janë në kërkim të të dyshuarit, ndërsa hetimet po vazhdojnë për zbardhjen e plotë të rastit.