BE e ndarë për Ukrainën, liderët evropianë nuk bien dakord për misionin paqëruajtës

Liderët evropianë u zotuan se do të vazhdojnë mbështetjen e përbashkët për Ukrainën, por dështuan në dhënien e garancive mbi sigurinë, sa i takon dërgimit të paqeruajtësve në rast të një akordi me Rusinë për ndalimin e luftës.

Kishte qenë një pyetje e Shtëpisë së Bardhë drejtuar aleatëve evropianë, nëse, mes të tjerash, do të ishin në gjendje të dërgonin trupa paqeruajtëse në vendin e gërryer nga lufta.

Presidenti francez Emmanuel Macron më parë ishte shprehur i hapur për këtë skenar. Po ashtu, kryeministri britanik Keir Starmer e bëri të qartë se ishte gati të bënte të njëjtën gjë, nëse Amerika do të jepte një garanci.

“Jam gati ta shqyrtoj angazhimin e trupave britanike në terren përkrah të tjerëve, nëse do të ketë një akord paqeje. Por këtu duhet një mbështetje nga Amerika, pasi garancia e saj është e vetmja mënyrë për të penguar Rusinë që të sulmojë sërish Ukrainën”, tha Starmer në përfundim të samitit të Parisit.

Ndërsa kancelari gjerman Olaf Scholz u shpreh më kategorik, duke thënë se çdo diskutim mbi paqeruajtësit ishte “tërësisht e parakohshme” dhe “shumë e papërshtatshme” në rrethanat aktuale, kur lufta vijon me gjithë brutalitetin e saj.

“Madje, jam pak i irrituar nga këto debate”, tha Scholz në përfundim të takimit.

Kryeministrja daneze ndërkohë, Mette Frederiksen u shpreh se vendi i saj ishte i hapur për idenë e paqeruajtësve, por vuri në dukje se çështja ka ende shumë pyetje që duhet të marrin përgjigje.

LEXONI GJITHASHTU:

• Negociatat për Ukrainën: SHBA jo vetëm në Riad, i besuari i Trump takime në Evropë
• “Ukraina në BE, por jo në NATO”- Kremlini: Putin i gatshëm të takohet me Zelenskyn