Numri i kalimeve të paligjshme mes Meksikës dhe SHBA-së ka rënë me 94 për qind 

Numri i kalimeve të paligjshme në kufirin jugor të Shteteve të Bashkuara është ulur me 94 për qind krahasuar me të njëjtën periudhë të vitit të kaluar, tha shefi i Patrullës Kufitare, Mike Banks.

Banks tha në një intervistë për CBS se merita për këtë i takon masave për të luftuar emigracionin e paligjshëm të prezantuara nga administrata e presidentit amerikan Donald Trump.

Gjatë shtatë ditëve të fundit, tha Banks, agjentët e Patrullës Kufitare kanë ndaluar mesatarisht 285 emigrantë në ditë përgjatë gjithë kufirit jugor, krahasuar me rreth 4,800 në të njëjtën kohë vitin e kaluar.

Masat që kontribuan më shumë në këtë, thekson Banks, janë urdhri ekzekutiv për mbylljen e sistemit të azilit në SHBA dhe dëbimin e përmbledhur, si dhe anulimin e politikës që lejonte disa emigrantë të hynin në vend me lejen e qeverisë.

Banks thotë gjithashtu se vendosja e trupave shtesë nga administrata Trump në kufirin jugor dhe vendimi për të vendosur ushtarë të Gardës Kombëtare të Teksasit si oficerë të imigracionit kanë ndihmuar agjentët e Patrullës Kufitare në terren.

“Këto veprime kanë ndaluar në mënyrë efektive lirimin e emigrantëve në brendësi të SHBA-së dhe dërguan një paralajmërim të fortë për ata që mendojnë të udhëtojnë në kufirin e SHBA-së se me shumë mundësi do të deportohen nëse hyjnë në vend pa leje. Sa më i madh të jetë dënimi, aq më i madh është parandalimi”, tha Banks.

LEXONI GJITHASHTU:

• Waltz: Garancitë e sigurisë për Ukrainën, thelbësore për marrëveshjen me SHBA-në
• Presidenti kinez Xi Jinping pritet të vizitojë SHBA, s’ka detaje mbi afatin kohor