Hidhet shorti, kush është gjyqtarja që do të shqyrtojë apelin e Safet Bajrit

Nën akuzë për vrasjen e Fatbardh Licit, Behar Bajri, Safet Bajri dhe Astmer Bilali kanë ankimuar në apel vendimin e 24 shkurtit, të GJKKO dhe kërkojnë lirimin nga burgu.

Gjyqtarja Tereza Merkaj është përzgjedhur me short për të shqyrtuar kërkesat e të arrestuarve, ndërsa nuk është vendosur ende një datë për shqyrtimin e çështjes.

“Gjykata e Posaçme e Apelit për Korrupsionin dhe Krimin e Organizuar ka regjistruar çështjen penale nr. 20, akti, datë 13.03.2025, mbi ankimet e ankuesve S.R., A.B. dhe B.B., me objekt: ‘Ankim ndaj vendimit nr. 12, datë 17.02.2025 dhe vendimit nr. 22, datë 24.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar’, në lidhje me masat e sigurimit personal.”

“Sipas shortit, trupi gjykues monokratik përbëhet nga gjyqtarja Tereza Merkaj”, thuhet në njoftim.

Të tre akuzohen për vrasjen e Fatbardh Licit në gusht të vitit 2018 në Shkodër si dhe për pjesëmarrje në një grup të strukturuar kriminal.

Sipas SPAK, tre të dyshuarit dyshohet se ekzekutuan xhaxhain e kundërshtarit të tyre, Ibrahim Lici, si një akt hakmarrje për vrasjen e mikut të tyre, Boran Bërcana. Ky i fundit u ekzekutua brenda në makinën e tij, së bashku me partneren e tij, Silvi Ndoci.

Në njoftimin zyrtar, SPAK sqaron se Safet Rustem Bajri, Astmer Bilali dhe Behar Bajri janë të dyshuar për vrasjen e Fatbardh Licit më 10 gusht 2018 nga një atentat i ndodhur në Kiras të Shkodrës.

• Mohon përfshirjen në vrasjen e Fatbardh Licit, GJKKO lë në burg Safet Bajrin
• “Bajri ra në kurth”, gazetari: Shkoi vetë në polici, nuk e dinte për urdhër-arrestin