Mohon përfshirjen në vrasjen e Fatbardh Licit, GJKKO lë në burg Safet Bajrin

GJKKO ka lënë në fuqi masën “arrest në burg” për Safet Bajrin, Behar Bajrin dhe Astmer Bilalin të akuzuar për vrasjen e Fatbardh Licit në gusht të vitit 2018 në qytetin e Shkodrës.

Në sallën e gjyqit Safet Bajri mësohet se ka mohuar përfshirjen e tij në vrasjen e Fatbardh Licit 7 vite më parë në qytetin e Shkodrës.

Safet Bajri u arrestua të premten në Shkodër me urdhër të SPAK dhe më pas u transferua nga forcat speciale drejt Tiranës.

53-vjeçari Fatbardh Lici, i vrarë rreth 7 vite më parë, dyshohet se është viktimë e përplasjes së vazhdueshme mes fiseve Lici dhe Bajri në Shkodër.

Sipas hetimeve të prokurores së SPAK, Elida Kaçkini, dhe vendimit të gjyqtares së posaçme, Etleva Deda, masa e sigurisë “arrest me burg” është dhënë edhe për Behar Bajrin, i njohur gjithashtu me mbiemrin Brajoviq, dhe Astmer Bilalin.

Safet Bajri ka qenë më herët i ndaluar nga autoritetet e drejtësisë, gjatë operacionit “Oaz” të zhvilluar nga ish-Prokuroria për Krime të Rënda, por më pas është liruar.

Ai ka qenë i dënuar edhe në Belgjikë, ndërsa gjatë javëve të fundit banesa e tij në Dobraç është kontrolluar disa herë me urdhër të SPAK, në kuadër të disa procedimeve penale.

LEXONI GJITHASHTU:

• SPAK njoftim zyrtar për arrestimin e Safet Bajrit, urdhërarrest për Astmer Bilalin
• I qetë e i buzëqeshur, momenti kur RENEA shoqëron në Policinë e Tiranës Safet Bajrin