Liga Unike e Basketbollit, Flamurtari luan në finale me Pejën

Flamurtari dhe Peja janë dy ekipet finaliste të Ligës Unike në basketboll për femra. Në gjysmëfinale vlonjatet eliminuan Bashkimin, ndërsa skuadra nga Kosova triumfoi ndaj Partizanit.

Liga Unike ka dhuruar emocione në dy ndeshjet gjysmëfinale të zhvilluara në qytetin e Vlorës, ndërsa janë konfirmuar dhe skuadrat që do të ndajnë trofeun me njëra-tjetrën. Flamurtari i Vlorës ka mposhtur Bashkimin e Prizrenit në një duel të luftuar, i mbyllur në shifrat 82-80. Në përfundim, trajnerët e të dyja ekipeve analizuan përballjen e luajtur.

“Kjo ishte një fitore shumë e rëndësishme, duke ditur çfarë skuadre kishim përballë. Bashkimi ishte një skuadër që i kishte të gjitha fitoret, na ka mundur dy herë, por ne sot e kishim studiuar lojën e Bashkimit, duke parë pikat e forta që ishin lojtarët kryesorë. Duke u mbrojtur mirë, ne arritëm këtë sukses. Ndeshja pati gabime nga të dy ekipet, por fiton ajo që gabon më pak”, thotë Agim Dalipi, trajner i Flamurtarit.

Nga ana tjetër, trajneri Viktor Kovac i Bashkimit theksoi se u zhvillua një ndeshje shumë e bukur dhe fitoi skuadra që bëri më pak gabime në fund.

“Nëse skuadra kundërshtare shënon 82 pikë, sigurisht që nuk mund ta fitojmë dot lojën. Ne nuk e kemi atë potencial të shënojmë 100 ose 90 pikë. Mbrojtja nuk ishte mirë, jo mirë mjaftueshëm, dhe nuk mbaj mend ndonjë ndeshje që kemi fituar kur skuadra kundërshtare ka shënuar mbi 70 pikë”, shprehet Viktor Kovac, trajner i Bashkimit.

Në ndeshjen tjetër, Peja ka fituar përballë Partizanit 73-64, në një tjetër takim emocionues. Finalja e këtij kompeticioni është Flamurtari-Peja, që do të luhet ditën e enjte, më 20 mars.