Studiuesit finlandezë: Mund të ketë më shumë se 8.2 mld njerëz që jetojnë në planet

Një studim i ri nga studiues në Universitetin Aalto në Finlandë sugjeron se qeveritë, organizatat ndërkombëtare dhe studiuesit mund të kenë nënvlerësuar ndjeshëm numrin e njerëzve që jetojnë aktualisht në planetin Tokë, sepse shumica e bazave të të dhënave nuk përfshijnë përqindjen e njerëzve që jetojnë në zonat rurale, të cilat janë të vështira për t’u gjurmuar dhe regjistruar.

Një studim nga studiues finlandezë, i botuar në revistën Nature Communications, i cili analizoi pesë nga bazat e të dhënave më të përdorura të popullsisë globale – WorldPop, GVP, GRUMP, LandScan dhe GHS-POP – tregoi se popullsia totale zyrtare prej 8.2 miliardë në planetin Tokë potencialisht nuk përfshin 53 deri në 84 për qind të popullsisë rurale.

Edhe grupet më të besueshme të të dhënave të vitit 2010 u zbuluan se nënvlerësonin popullsinë rurale me 32 deri në 77 për qind dhe ekipi hulumtues tha se kishte arsye të forta për të besuar se të njëjtat gabime ishin depërtuar në bazat e të dhënave të mëvonshme të popullsisë globale nga 2015 dhe 2020, raportoi Iflscience.com.

“Për herë të parë, studimi ynë ofron prova se një pjesë e konsiderueshme e popullsisë rurale mund të mungojë në bazat e të dhënave të popullsisë globale,” tha autori i studimit Josias Lang-Ritter, i cili është gjithashtu një studiues në Universitetin Aalto.

Studimi nxjerr në pah problemet me mënyrën se si mblidhen të dhënat e popullsisë nga zonat rurale, veçanërisht në vendet në zhvillim, si dhe rajonet e prekura nga kriza dhe zonat jo të industrializuara.

Si shembull, thuhet se bazat e të dhënave GRUMP dhe WorldPop përdorin satelitë për të monitoruar popullsinë, duke regjistruar dritat e natës, por se kjo teknikë ka potencialin të injorojë zonat që nuk kanë energji elektrike.