Rama prezanton programin për infrastrukturën: Do të ndërtojmë 700 km rrugë të reja

Kryeministri Edi Rama prezantoi këtë të shtunë ofertën politike të Partisë Socialiste për zgjedhjet e 11 majit. Duke u ndalur tek programi i infrastrukturës, Rama premtoi se në mandatin e katërt pritet të ndërtohen 700 km rrugë.

Shefi i qeverisë prezantoi edhe një listë të akseve rrugore që pritet të realizohen brenda këtij mandati nëse Partia Socialiste fiton zgjedhjet.

“Gjatë mandatit të katërt, do të ndërtojmë edhe 700 kilometra rrugë të reja. Ju do t’i keni të gjitha këto specifike sipas qarqeve. Rruga e Bregut, Dhërmi-Sarandë, brenda mandatit të katërt do të jetë një rrugë turistike, që do të vazhdojë atë nga tuneli i ri i Llogarasë, deri në Dhërmi.

Rruga e shumëpritur, e shumë dëshiruar dhe e shumë nevojshme, Tiranë-Krujë, rruga Berat-Çorovodë do të jetë një rrugë me parametra dhe standarde europiane. Ura e Leklit Përmet-Çarshovë, pra do të jenë të lidhura bashkë të gjitha. Ersekë-Leskovik, Rrëshen-Burrel, Vau i Dejës-Pukë-Fushë Arrëz, Rruga e Vjetër Tepelenë-Vlorë, Ura mbi lumin Vjosë-Selenicë. Skrapar-Gramsh, Skrapar-Përmet, Gjirokastër-Libohovë, Poliçan-Zagori, pra, siç shihet, këto segmente tani janë jo vetëm lidhje nga pika A në pikën B, por krijojnë arterie të brendshme që lehtësojnë shumë lidhjen midis qyteteve tona turistike. Kur të shkohet në Korçë, do mund të shkohet edhe në Përmet dhe Gjirokastër pa pasur nevojë të kthehesh dhe t’i biesh prapë nga Tirana.

Ndërkohë që brenda vitit 2026 do të përfundojë faza e parë dhe e dytë e superstradës Tiranë-Durrës. Po ashtu përfundon edhe Kombinat-Ndroq-Plepa. Maqellarë-Peshkopia do të përfundojë këto ditë, Qukës-Qafë Plloçë, Berat-Ballaban përfundon po këtë vit”, tha Rama.

LEXONI GJITHASHTU:

• Rama flet nga Elbasani: I kemi të fituara zgjedhjet, prandaj nuk bëjmë premtime
• Rama prezanton programin ekonomik: Pensioni do bëhet 200 euro, paga minimale 500