Rama dhe Balluku inspektojnë kantierin e rrugës Ndroq-Plepa, kur përfundojnë punimet

Kryeministri Edi Rama dhe zv.kryeministrja njëkohësisht ministrja e Infrastrukturës dhe Energjisë, Belinda Balluku inspektuan punimet në kantierin e rrugës Kombinat – Ndroq – Plepa, një projekt që është në fazën e parë të rindërtimit dhe do të vazhdojë në tre faza.

Ministrja Balluku tha se faza e parë e projektit është parashikuar të përfundojë më 16 maj të vitit 2026, por pritshmëritë dhe synimet janë që të mbyllet para kohe, konkretisht në fundin e vitit 2025.

“Afati i përfundimit është 16 maji 2026, por synojmë ta mbyllim më 31 dhjetor 2025 fazën e parë. Me alokimin e buxhetit të ri, do të hapen dy fazat e tjera të këtij aksi Kombinat-Plepa”, tha Balluku.

Ministrja shtoi se një pjesë e rëndësishme e investimit është edhe rindërtimi i Urës së Beshirit, e cila do të eliminojë kthesat e ngushta dhe do të rrisë sigurinë rrugore.

Ajo theksoi se nga rrugë rurale, kjo do të kthehet në një rrugë të kategorisë C, ndërsa ura e re do të bëhet pjesë e projektit të Bankës Botërore për ndërtimin e urave.

“Ura e Beshirit do të ndërtohet komplet e re, 1.6 kilometra urë që do të eliminojë të gjitha kthesat. Kjo do të jetë një rrugë e kategorisë C, ku shpejtësia do të arrijë deri në 100 km në orë, sigurisht duke respektuar rregullat e qarkullimit rrugor,” tha Balluku.

Ndërkohë, kryeministri Rama lidhur me këtë projekt infrastrukturor u shpreh se do të jetë një aks me profil turistik.

“Është një nga akset e shumëkërkuara që i erdhi radha dhe do të jetë një aks me profil turistik. Ne besojmë shumë që zhvillimi i agroturizmit do të ketë ndikim pozitiv në ekonominë e kryeqytetit dhe për ekonominë familjare këtu, pasi është një zonë që do të përfitojë shumë nga rritja e turizmit dhe flukset që shkojnë drejt Tiranës apo Durrësit,” theksoi Rama.

LEXONI GJITHASHTU:

• Balluku inspekton punimet në aksin Kombinat-Ndroq-Plepa: Kur pritet të përfundojnë
• Inspektimi në Koridorin VIII, Balluku: Një pjesë e projektit përfundon në shtator