Inspektimi në Koridorin VIII, Balluku: Një pjesë e projektit përfundon në shtator

Kryeministri Edi Rama inspektoi sot kantierin e Koridorit VIII, ku po ndërtohen dy tunele të rëndësishëm me gjatësi 1.1 km secili, që do të lidhin Elbasanin me Librazhdin. Rama ishte i shoqëruar nga kreu politik i qarkut, Arbian Mazniku, dhe zv/kryeministrja Belinda Balluku, të cilët panë nga afër ecurinë e punimeve, përfshirë ndërtimin e urave që do të lidhen me tunelet.

Zv/kryeministrja Balluku dha detaje mbi progresin e projektit, duke theksuar se tuneli është drejt përfundimit.

“Nga shtatori do të kemi dritë nga ana tjetër. Tunelet janë 1.1 km dhe deri në fund të shtatorit do të kemi përfunduar me gërmimin. Më pas do të vijojë faza tjetër, për ta dorëzuar në fillim të pranverës së vitit të ardhshëm,” tha ajo.

Balluku sqaroi gjithashtu se aktualisht po punohet në urën e Murashit, e cila është pjesë e një segmenti më të gjerë prej 26 kilometrash që lidh Elbasanin me Librazhdin.

“Kemi dy ura me pesë hapësira që lidhen direkt me tunelin dhe janë vazhdim i gjithë segmentit, i cili po ndërtohet me ritme të mira,” shtoi ajo.

Sipas Ballukut dhe Ramës, ky projekt konsiderohet një investim strategjik për infrastrukturën e vendit, duke lehtësuar kështu dhe lidhjet rrugore.

LEXONI GJITHASHTU:

• Lidhjet e paligjshme të energjisë, lëshohen urdhër-arreste për 16 punonjës të OSHEE
• Policia e Kosovës kryen aksion policor në dy rajonet e Mitrovicës