Miratohet draft-rezoluta për Kosovën, kërkohet heqja e masave të BE-së

Komiteti për Politikën e Jashtme në Parlamentin Evropian ka votuar draft-rezolutën për Kosovën, në të cilën, mes tjerash, kërkohet heqja e menjëhershme e masave të BE-së.

Raportuesi i këtij institucioni për Kosovën, që është edhe autor i raportit, Riho Terras, ka theksuar se vendi i Kosovës tashmë është në BE.

Në këtë dokument mbështetet aplikimi i Kosovës për anëtarësim në BE dhe ftohen vendet anëtare, të cilat nuk e kanë njohur Kosovën, që ta bëjnë një gjë të tillë pa vonesa të tjera.

Parlamenti Evropian mbështet edhe kërkesën e Kosovës për anëtarësimin në Këshillin e Evropës dhe planin për t’iu bashkuar programit të Partneritetit për Paqe të NATO-s.

Po ashtu, nënvizohet progresi domethënës në fushën e drejtësisë, të sigurisë dhe lirive, të luftës kundër krimit të organizuar dhe të funksionimit të ekonomisë së tregut, por shprehen rezerva në lidhje me përparimin e limituar në sundimin e ligjit.

Shqetësim serioz shprehet edhe për dobësitë sistematike të sistemit të drejtësisë në Kosovë, sidomos sa i përket pavarësisë dhe respektimit të ndarjeve të pushteteve dhe, po ashtu, për situatën e sigurisë në veri të Kosovës, posaçërisht pas sulmit të armatosur në Banjskë dhe atij në Ibër Lepenc, ku kërkohet sjellja para drejtësisë e autorëve të këtyre sulmeve.

Keqardhje e veçantë shprehet përse Serbia nuk i ka nxjerrë para drejtësisë autorët e sulmit terrorist në Banjskë, përfshirë ish-nënkryetarin e Listës Serbe, Millan Radoiçiç.

Dokumenti shpreh mbështetje për procesin e dialogut për normalizimin e raporteve mes Kosovës dhe Serbisë dhe përshëndet emërimin e Peter Sorensenit në postin e emisarit për këtë dialog.

Pas aprovimit në Komitetin për Politikë të Jashtme, ky dokument gjatë muajve të verës do të votohet në seancë plenare, kur do të marrë edhe versionin e Rezolutës së Parlamentit Evropian.

LEXONI GJITHASHTU:

• Osmani diskuton me ambasadorët e BE: Të largohen masat e padrejta ndaj Kosovës
• Me gjithë kapacitetet e kufizuara, Kosova vijon gjykimin e krimeve të luftës