Ndërron jetë ish-Kryeprokurori i Shtetit në Kosovë

Ish-Kryeprokurori i Shtetit dhe ish-Kryesuesi i Këshillit Prokurorial të Kosovës, Ismet Kabashi, ka ndërruar jetë më datë 13 prill. Kabashi ishte një figurë e njohur dhe e respektuar në sistemin e drejtësisë në Kosovë, me një karrierë të shquar si prokuror dhe gjyqtar.

Familjarët e tij njoftuan se varrimi do të zhvillohet më këtë të hënë, në varrezat e Shipolit në Mitrovicë. Në orën 15:00, do të mbahet një ceremoni përkujtimore në Sallën e Kulturës në Mitrovicë, ku do të nderohet kontributi i tij i çmuar në forcimin e sistemit të drejtësisë.

Në lidhje me ndarjen nga jeta të Kabashit, ka reaguar dhe ushtruesi i detyrës së Kryeprokurorit të Shtetit, Besim Kelmendi, kryesuesi i Këshillit Prokurorial të Kosovës, Ardian Hajdaraj, dhe ish-Kryeprokurori i Shtetit, Aleksandër Lumezi, të cilët shprehin ngushëllimet e sinqerta për familjarët dhe miqtë.

Kabashi ka shërbyer si gjyqtar dhe kryetar i Gjykatës Komunale të Skenderajt, si dhe gjyqtar në Gjykatën Komunale dhe Gjykatën e Qarkut në Mitrovicë. Ai ka luajtur një rol të rëndësishëm në ngritjen e institucioneve të reja të pushtetit gjyqësor pas shpalljes së Pavarësisë së Kosovës, duke kontribuar në forcimin e sundimit të ligjit dhe zhvillimin e sistemit të drejtësisë në vend.

Gjatë karrierës së tij, Kabashi u dallua për integritetin dhe përkushtimin ndaj profesionalizmit, duke dhënë një kontribut të rëndësishëm në fuqizimin e institucionit të Prokurorit të Shtetit.