Greqia miraton planin detar, përcakton kufijtë e Zonave Ekskluzive Ekonomike

Autoritetet në Greqi kanë miratuar të ashtuquajturin Plani Hapësinor Detar, që pritet të aprovohet në komisionin e posaçëm parlamentar e që në bazë të Ligjit për Detin reflekton zonat ekzistuese dhe ato potenciale detare.

Gazeta helene “Protothema” raporton në edicionin e saj online se vendi ballkanas do të dalë edhe me një hartë që do të marrë statusin evropian.

Plani Hapësinor Detar reflekton Zonat Ekskluzive Ekonomike të kufizuara në kuadër të dy marrëveshjeve me Italinë dhe asaj të pjesshme me Egjiptin, ndërsa në pjesët e tjera zonat në fjalë paraqiten ashtu siç përcaktohen nga ligji 4001/2011, që vendos kufirin e jashtëm të zonave në vijën e mesme me vendet me të cilat nuk ka pasur një marrëveshje.

Me hartën tashmë të aprovuar dhe të bërë publike, Greqia për herë të parë reflekton pretendimet e saj në hapësirën kontinentale, ose në Zonat Ekskluzive Ekonomike bazuar në Ligjin për Detin.

Ky plan përbën gjithashtu përgjigjen më të vlefshme të Athinës ndaj përpjekjeve të njëanshme të Turqisë për të imponuar një fakt të kryer duke dorëzuar në OKB kufijtë e jashtëm të Zonës së saj Ekskluzive Ekonomike, të cilët i ka llogaritur bazuar në memorandumin turko-libian, duke vënë në dyshim marrëveshjen Greqi-Egjipt.

E cilësuar si “makthi i Turqisë”, harta është pasqyruar në dokumentet zyrtare greke, është publikuar në gazetën qeveritare dhe i është dorëzuar Bashkimit Evropian.

Plani i jep gjithashtu Greqisë ndikim të plotë në brigjet kontinentale dhe ishujt, duke e çuar Zonën Ekskluzive Ekonomike greke deri në kufijtë perëndimorë të asaj qipriote.

Harta tregon edhe ujërat territoriale ekzistuese të vendit, që arrijnë deri në 12 milje nautike në detin Jon dhe në 6 milje në zonat e mbetura, me të drejtën për t’u zgjeruar deri në 12 milje, duke u bazuar tek Ligji për Detin.

Kjo nënvizon edhe natyrën detyruese të ligjit në fjalë, edhe për vende si Turqia që nuk janë pjesë e Konventës së posaçme.

LEXONI GJITHASHTU

• Greqia kërkon naftë në detin Jon, Meçollari: Është zonë e kontestuar
• Çfarë do të bëjë Greqia për çështjen e detit me Shqipërinë?