Elbasan, besimtarët e Komunitetit Ungjillor dhurojnë gjak për fëmijët talasemikë

Në vigjilje të Pashkëve, fëmijët talasemikë në Elbasan do të marrin një dhuratë jete nga besimtarët e Komunitetit Ungjillor.

Dhurimi i gjakut, sipas përfaqësuesve të komunitetit, bëhet jo vetëm si ndihmë për këta fëmijë, por edhe për t’iu dhënë atyre shpresë dhe për t’u treguar se nuk janë vetëm.

“Është viti i nëntë që Komuniteti Ungjillor organizon dhurimin e gjakut për fëmijët talasemikë. Siç dihet, këta janë fëmijë që vuajnë për shkak të kësaj sëmundjeje. Ne duam të jemi pranë tyre dhe t’u tregojmë që ka shpresë. Kjo merr edhe më shumë kuptim në këtë vigjilje Pashkësh, sepse ashtu si Jezusi dha gjakun për të falur mëkatet dhe për t’i dhënë shpresë njerëzimit, edhe ne besojmë se ka shpresë kur vendosim besimin tonë te Perëndia,” u shpreh pastori Ilirjan Gjoni.

Për të dhuruar “lëngun e jetës”, siç e quajnë ata, Alketa dhe bashkëshorti i saj udhëtuan posaçërisht nga Lushnja në Elbasan.

“Kemi ardhur enkas bashkë me bashkëshortin nga Lushnja, vetëm për të ndihmuar fëmijët që janë në nevojë. T’i japim sadopak ndihmë, sepse gjaku është jetik për ta,” tha ajo.

“Mesazhi im është: sa më shumë njerëz të dhurojnë gjak, aq më shumë jetë shpëtojmë,” shton një tjetër qytetar pjesëmarrës në nismë.

Qëllimi i kësaj nisme është të rrisë ndërgjegjësimin dhe të nxisë dhurimin vullnetar të gjakut.

“Të dhurosh gjak është gjëja më e mirë që mund të bësh në këto ditë festash – shpëton jetën e një fëmije,” thotë një vajzë e re.

“Ajo çfarë dua të theksoj është që populli duhet të ndërgjegjësohet. Të jemi ndihmë për ata që kanë nevojë, sepse nesër mund të jemi ne që kemi nevojë për gjak,” shton një qytetar tjetër.

Për mjekët dhe përfaqësuesit e Kryqit të Kuq, të dhurosh gjak për njerëzit talasemikë është ndër gjestet më të çmuara – jo vetëm në prag festash, por në çdo kohë.

LEXONI GJITHASHTU:

• Arrestohet turisti turk në Krujë, 23-vjeçari mori rojën e parkingut mbi kofano
• Kundërshtojnë me dhunë efektivët e dëmtojnë mjetin e policisë, arrestohen 3 vëllezër