Çfarë përgjigjeje pret nga LDK-ja, ja çfarë thotë Kurti

“Ato janë çështje të Prishtinës”, tha kryeministri në detyrë, Ablin Kurti të martën më 6 maj, kur u pyet nëse pret përgjigje pozitive nga Lidhja Demokratike e Kosovës, pas ftesës së dërguar dje.

Kryetari i Lëvizjes Vetëvendosje, Albin Kurti, i dërgoi letër kreut të LDK-së, Lumir Abdixhiku më 5 maj, duke i bërë ftesë për koalicion. Deri më tani, Abdixhiku nuk i ka kthyer përgjigje zyrtare.

“Ato janë çështje të Prishtinës, këtu jemi për banim”, tha shkurt Kurti për KosovaPress pasi e vendosi gurthemelin e objekteve për banim të përballueshëm dhe social në Gjilan.

Më pas, ai u pyet nga mediat nëse “opozita po e zvarritë konstituimin nga frika se më pas LVV-ja do të formojë qeverinë e re”.

“Nuk është kollaj të analizojmë frikën e opozitës, edhe kjo është punë për analistë. Unë kryeministër, vazhdojmë tutje ose VVazhdojmë tutje”, tha Kurti.

Deputetët kanë dështuar sërish më 5 maj të konstituojnë Kuvendin e Kosovës, pasi LVV-ja nuk ka arritur t’i sigurojë 61 votat e nevojshme.

Deri më tani janë bërë njëmbëdhjetë përpjekje të pasuksesshme për konstituim.

Lëvizja Vetëvendosje nuk po heq dorë nga emri i Albulena Haxhiut si e propozuar për kryeparlamentare, ndërkaq PDK dhe AAK po kërkojnë që të ndryshohet propozimi.