Ekzekutohet urdhri i ndalimit nga SPAK për babain e kandidates së PSD-së në Fier

SPAK ka ndërmarrë një aksion në Fier, ku sipas gazetarit të Euronews Albania, Eni Ferhati, është ekzekutuar urdhri i ndalimit për shtetasin Pandeli Bozha, babain e kandidates së PSD-së, Limonera Bozha.

Në Fier është vënë re një prani e shtuar e SPAK, me dy prokurorët e deleguar, Sotir Kllapi dhe Doloreza Musabelliu.

Urdhëri i ndalimit për Pandeli Bozhën, i njohur gjithashtu me emrin Agim Brahimllari, ka ardhur pas dyshimeve për korrupsion aktiv gjatë zgjedhjeve të 11 majit.

Bëhet fjalë për një hetim proaktiv, të ndjekur në bashkëpunim mes SPAK dhe Drejtorisë Vendore të Policisë Fier, ku për një periudhë të gjatë është hetuar aktiviteti i familjarëve të afërt të kandidates së Partisë Socialdemokrate.

Dyshohet se janë premtuar dhe shpërndarë shuma monetare në favor të votës për kandidaten e PSD-së në Fier.

Ky është rasti i tretë ku SPAK ka vënë në shënjestër dhe ka goditur struktura të lidhura me Partinë Socialdemokrate të Tom Doshit.

• Rasti i parë u regjistrua dy ditë para zgjedhjeve në Shkodër, me kontrolle në zonat e Vaut të Dejës, Malësisë së Madhe dhe Babullush, për dyshime mbi blerje votash.
• Rasti i dytë ndodhi të shtunën, pak orë para hapjes së votimeve në Kukës, ku dy kushërinj (njëri i arrestuar dhe tjetri në kërkim) dyshohen për përfshirje në shit-blerje votash, gjithashtu si mbështetës të PSD-së.
• Rasti i tretë është ky i Fierit, ku përsëri në qendër të hetimit është një eksponent i afërt me kandidaten e PSD-së.

LEXONI GJITHASHTU:

• PS dominon Fierin, kryeson me 69% pas 14 kutive të para
• Ambasadori i BE, Gonzato takohet me prokurorë të Fierit dhe të SPAK-ut