Shehaj i kërkon shpjegime ministrit Hoxha për parregullsi në numërimin e votave

Pas ankesave të Partisë Mundësia për parregullsi në KZAZ 32, ku sipas përfaqësuesvë të saj, disa vota të pavlefshme janë numëruar si të vlefshme, ka ndërhyrë vetë kryetari i kësaj partie, Agron Shehaj.

Ai ka mbërritur në KZAZ dhe, pas një debati me kryetarin e këtij komisioni, ka kërkuar shpjegime nga numëruesit e votave.

Shehaj u ka bërë thirrje numëruesve që të mos kalonin fletët e pavlefshme si të vlefshme, duke paralajmëruar se një veprim i tillë përbën vepër penale. Ai ka shtuar se nëse ndodhte një gjë e tillë, ata do të mbajnë përgjegjësi.

Pas kësaj, Shehaj ka pasur disa replika me ministrin e Brendshëm, Ervin Hoxha, i cili ndodhej në sallën e numërimit si përfaqësues i Partisë Socialiste.

“Zoti ministër, na tregoni pak çfarë po ndodh këtu. Ju e dhatë urdhrin që një nga kandidatët të largohej sepse po kërkonte të drejtat e saj. Pse fshiheni, zoti ministër? Turp t’ju vijë! Është e lehtë të merresh me kandidatët kur je ministër, por imagjinoni se çfarë mund të bëni jashtë kësaj salle!” – tha Shehaj.

Ai gjithashtu njoftoi kryetarin e KQZ-së, duke i kërkuar ndërhyrje për të monitoruar situatën.

“Vëzhguesit tanë e kanë identifikuar problemin dhe e kanë sinjalizuar. Kandidatja dhe nënkryetarja e Partisë Mundësia është kërcënuar në ambientet e numërimit, ndërkohë që ministri nuk ka ndërhyrë fare,” – theksoi Shehaj.

Shehaj ka thirrur një nga vëzhgueset për të dhënë informacion mbi atë që kishte parë.

Vëzhguesja, e cila përfaqësonte Lëvizjen Bashkë, tha: “Po monitoroja dhe kur u thoshim që të prisnin, ata vazhdonin. Ishte e qartë se ata po ndanin votat për parti të ndryshme, duke hedhur për një parti dhe duke e regjistruar për një tjetër.”

LEXONI GJITHASHTU:

• VIDEO/ Tensione në Tiranë, Agron Shehaj akuzon kreun e KZAZ 32 për parregullsi
• Përfundon numërimi i votave në Bashkinë e Vlorës, PS fiton bindshëm