VIDEO/ Tensione në Tiranë, Agron Shehaj akuzon kreun e KZAZ 32 për parregullsi

Një përplasje e tensionuar është shënuar në KZAZ 32 në zonën e Shkozës, ku Partia Mundësia ka akuzuar komisionin për përfshirjen e një flete të pavlefshme në numërimin e votave si të vlefshme.

Tensioni ka përfshirë edhe përfaqësues politikë në terren, përfshirë kryetarin e Partisë Mundësia Agron Shehaj dhe nënkryetaren Barbara Dodaj të cilët kanë pasur një debat me kreun e KZAZ 32.

Sipas pretendimeve të Partisë Mundësia, në kutinë 1706/1 është konstatuar një fletë votimi e pavlefshme e cila, sipas tyre, është llogaritur si e vlefshme në favor të një partie tjetër.

Agron Shehaj, i pranishëm në vendngjarje, iu drejtua kryetarit të KZAZ-së duke i thënë:
“Ju është thënë nga vëzhguesit tanë se disa fletë të pavlefshme i keni llogaritur si të vlefshme. Ju jeni njoftuar për këtë dhe sërish e keni lejuar të ndodhë.”

Nga ana tjetër, kryetari i KZAZ 32 e mohoi kategorikisht çdo tentativë për manipulim. Ai konfirmoi se kishte kërkuar ndërhyrjen e policisë pasi, sipas tij zonja Dodaj po pengonte procesin e numërimit.

“Zonja Barbara Dodaj më ka vënë në dijeni për shqetësimin se një fletë votimi e pavlefshme ishte konsideruar e vlefshme, ndërkohë që ishte e pavlefshme. “I thashë se kjo çështje do të monitorohet nga ana e KQZ-së. Pretendimi i zonjës Dodaj ishte i drejtë. Nuk kam interes të manipuloj procesin zgjedhor”, deklaroi kreu i KZAZ 32.

Barbara Dodaj, nënkryetare e kësaj partie, ka deklaruar se ka kërkuar që të hapej zarfi për të verifikuar vlefshmërinë e votës, por kërkesa nuk është pranuar nga kryetari i KZAZ-së.

“Kam kërkuar si nënkryetare e Partisë Mundësia që të hapej zarfi me votën e pavlefshme, por në vend të kësaj, kryetari më kërcënoi dhe thirri policinë për të më nxjerrë jashtë. Kërkova vetëm rinumërim, por u trajtova sikur po pengoja procesin. Më nxorën jashtë, edhe pse përfaqësoj një subjekt politik të regjistruar”, deklaroi Dodaj.

Sipas Partisë Mundësia, në kutinë me numër 1706/1 janë konstatuar fletë votimi të pavlefshme të cilat janë llogaritur si të vlefshme gjatë numërimit.

Në një njoftim publik, Partia Mundësia bën me dije se ka kërkuar zyrtarisht rinumërimin e kësaj kutie, por kërkesa nuk është pranuar nga KZAZ-ja përkatëse.

Për këtë çështje, sipas deklaratës, është informuar edhe kreu i Komisionit Qendror të Zgjedhjeve, Ilirjan Celibashi.

Njoftimi i plotë:

“Në KZAZ 32 në Shkozë kërkuam rinumërimin e një kutie dhe KZAZ-ja nuk pranon. Disa fletë të pavlefshme i llogariten si të vlefshme. Kutia 1706/1. Mbi këtë ngjarje është lajmëruar edhe kreu i KQZ, Celibashi”, thuhet në njoftimin e Partisë Mundësia.

LEXONI GJITHASHTU:

• Shehaj i kërkon shpjegime ministrit Hoxha për parregullsi në numërimin e votave
• Përfundon numërimi i votave në Bashkinë e Vlorës, PS fiton bindshëm
• PS fiton bindshëm në Mallakastër, përfundon numërimi i votave