I pari në primare por jashtë listës, Hysen Kadiu reagon pas fitores së PD në Kavajë

Ka përfunduar procesi i votimit dhe numërimit të votave në bashkinë e Kavajës, ku Koalicioni Partia Demokratike – Aleanca për Shqipërinë Madhështore (PD-ASHM) ka dalë forcë e parë me 10,626 vota, që përbëjnë 53.75% të totalit.

Lidhur me këtë rezultat ka reaguar Kadiu një nga kandidatët më të votuar në primaret e PD, por që u la jashtë listës për deputetë nga Partia Demokratike.

Përmes një postimi në Facebook ai shprehet se “përballë vështirësive të regjimit dhe lojërave meskine të atyre që u dhurohen vende në listën e sigurt, fitimtarë dalin ata që punojnë me seriozitet dhe përkushtim”.

“Kavaja tregoi edhe një herë se, përballë çdo vështirësie, triumfon dëshira dhe vullneti i demokratëve për ndryshim.

Përballë çdo padrejtësie të kundërshtarit dhe jo vetëm, kavajasit vulosën me votën e tyre fitoren e PD-së. Puna dhe angazhimi i demokratëve të Kavajës dëshmuan se, përballë vështirësive të regjimit dhe lojërave meskine të atyre që u dhurohen vende në listën e sigurt, fitimtarë dalin ata që punojnë me seriozitet dhe përkushtim, pa u përfshirë në lojërat e pushtetit dhe duke u përqendruar te nevoja që kanë qytetarët për ndryshim.

Krenar për Kavajën dhe qytetarët e saj, ata që treguan sot e gjithmonë se demokracia triumfon në qytetin ku nisi lëvizja për ndryshimin e madh të viteve ’90. Një dëshirë dhe vullnet që nuk e ndal dot askush!” shprehet ai.

LEXONI GJITHASHTU:

• Mbyllet numërimi i votave për kandidatë në Himarë, kush është më i votuari
• Votojnë të dënuarit në burgun e Kavajës