“Situata është vënë nën kontroll”, Celibashi shkon me urgjencë në KZAZ-në 30

Kryekomisioneri i KQZ-së, Ilirjan Celibashi, shkoi me urgjencë në KZAZ-në nr. 30 të Kasharit pas incidentit të ndodhur gjatë numërimit të votave, ku – sipas pamjeve të publikuara – u sulmua fizikisht edhe kryetari i kësaj KZAZ-je.

Pas daljes nga ambientet e KZAZ-së, Celibashi deklaroi se situata është vënë nën kontroll, se janë marrë masat e nevojshme dhe se procesi i numërimit ka rifilluar.

“Mediat të jenë të pranishme gjatë numërimit. Numërimi në KZAZ-në e Kasharit ka filluar pa praninë e vëzhguesve politikë. Përjashtim bëjnë vëzhguesit ndërkombëtarë dhe përfaqësuesit e mediave. Mediat kanë të gjithë të drejtën për ta ndjekur procesin që nga dita e parë. Për shqetësimin e mediave, sapo ia kemi komunikuar Policisë së Shtetit prezencën tuaj. Nëse nuk ju lejojnë, do të kthehem përsëri këtu,” – tha Celibashi.

Lidhur me votën e kontestuar që shkaktoi përplasjen, Celibashi u shpreh se nuk ishte momenti për të komentuar përmbajtjen e saj dhe se kjo çështje nuk ishte brenda përgjegjësive të tij.

“Nuk kam asnjë koment sepse është tej përgjegjësisë sime. Nuk është çështje e KQZ-së pse personi është larguar. Policia e Shtetit është autoriteti kompetent për ndjekjen e kësaj çështjeje, dhe nuk ka nevojë për njoftim nga KQZ-ja,” – tha ai.

Për incidentin është bërë kallëzim në Polici, ndërsa Celibashi ka marrë masa të menjëhershme, duke pezulluar të gjitha badge-t e vëzhguesve dhe duke përjashtuar nga procesi të gjithë vëzhguesit politikë të akredituar – përjashtuar vëzhguesit ndërkombëtarë dhe përfaqësuesit e mediave.

Kujtojmë se në KZAZ-në nr. 30 në Kashar, një vëzhgues goditi dhe ofendoi kryetarin gjatë një përshkallëzimi të situatës në procesin e numërimit të votave.

LEXONI GJITHASHTU:

• “U godita pasi kërkova qetësi gjatë një kontestimi vote”, flet kryetari i KZAZ 30
• Qëlloi me grusht kryetarin e KZAZ në Kashar, arrestohet 26-vjeçari