Kërkohet audit për votat e Izraelit në Eurovizion, dyshime për manipulime

Suksesi i Izraelit në votimin publik në Festivalin e Këngës në Eurovision të fundjavës së kaluar ka nxitur thirrje nga një sërë vendesh për të shqyrtuar rezultatet dhe sistemin e votimit.

Këngëtarja Yuval Raphael doli e pari në votimet e shikuesve të shtunën me baladën e saj “New Day Will Rise”, por u rendit e dyti, pas Austrisë, kur u morën në konsideratë edhe rezultatet e jurisë.

Transmetuesit në Irlandë, Holandë, Belgjikë, Spanjë, Islandë dhe Finlandë kanë ngritur shqetësime ose pyetje në lidhje me votimin e publikut, me disa që kanë kërkuar një audit.

Organizatorët e Eurovisionit, Unioni Evropian i Transmetimeve (EBU), thanë se votimi ishte kontrolluar dhe verifikuar në mënyrë të pavarur dhe se ata i merrnin seriozisht çdo shqetësim.

Izraeli u rendit i 14-ti nga juritë kombëtare, por u ngjit në renditje falë rezultateve të votimit telefonik dhe online.

Belgjika, Holanda, Spanja dhe Mbretëria e Bashkuar ishin midis vendeve, shikuesit e të cilave i dhanë Izraelit maksimumin prej 12 pikësh, ndërsa Irlanda dhe Finlanda dhanë 10.

Transmetuesi irlandez RTE ka kërkuar nga organizatorët një analizë të plotë të votimit.

Kjo erdhi pasi transmetuesi spanjoll RTVE tha se do të kërkonte një hetim të rezultateve dhe një rishikim të sistemit të televotimit.

Shikuesit aktualisht mund të votojnë deri në 20 herë secili me anë të telefonit, mesazhit ose aplikacionit.

Katia Segers, një deputete flamande, tha: “Një sistem në të cilin të gjithë mund të hedhin deri në 20 vota është një sistem që inkurajon manipulimin.

“Duhet të hetohet nëse ky manipulim ka ndodhur në vendin tonë dhe në të gjitha vendet e tjera pjesëmarrëse dhe jo pjesëmarrëse”.

Një zëdhënës i transmetuesit publik flamand VRT tha: “Nuk kemi asnjë tregues se numërimi i televotave nuk është kryer siç duhet, por po kërkojmë transparencë të plotë nga ana e EBU-së”.

“Pyetja është mbi të gjitha nëse sistemi aktual garanton një pasqyrim të drejtë të mendimit të shikuesve dhe dëgjuesve”.

YLE e Finlandës tha: “Ne patjetër do t’i kërkojmë EBU-së nëse është koha për të përditësuar këto rregulla ose të paktën të shqyrtojmë nëse rregullat aktuale lejojnë abuzime”.

Të martën, transmetuesit publikë holandezë Avrotros dhe NPO lëshuan një deklaratë duke thënë se konkursi ishte “i ndikuar gjithnjë e më shumë nga tensionet shoqërore dhe gjeopolitike”.

Përfshirja e Izraelit “ngre pyetjen nëse Eurovision ende funksionon vërtet si një ngjarje apolitike, unifikuese dhe kulturore”, thanë ata.

LEXONI GJITHASHTU:

• Gazetari nga Zvicra: Shqipëria mund ta fitojë Eurovizionin me këngën “Zjerm”
• Olly heq dorë nga Eurovizioni! Kush do ta përfaqësojë Italinë