Tottenham Hotspur shpallet kampion i Europa League, i mjafton një autogol

Tottenham Hotspur është shpallur kampion i UEFA Europa League për sezonin 2024/25, pas një fitoreje 1-0 ndaj Manchester United në finalen e zhvilluar në stadiumin “San Mamés” në Bilbao.

Skuadra londineze siguroi trofeun falë një autogoli të Luke Shaw në minutën e 42-të, pas një aksioni të nisur nga krahu i djathtë me një krosim të Pape Matar Sarr dhe ndërhyrjes vendimtare të Brennan Johnson. Tottenham arrin kështu trofeun e parë evropian pas shumë vitesh, duke përfunduar një periudhë të gjatë pa fitore në kompeticione madhore.

Ndeshja nisi me raste nga të dyja skuadrat. Brennan Johnson krijoi një mundësi të mirë për Tottenham, por gjuajtja e Sarr u ndal nga Maguire. Manchester United reagoi me një goditje të Amad Diallo-s, por pa rezultat konkret.

Në pjesën e dytë, Manchester United u përpoq të rikuperonte rezultatin me tentativa nga Rasmus Højlund dhe Bruno Fernandes, por nuk arriti të shënojë. Portieri i Tottenham-it, Guglielmo Vicario, dhe mbrojtja e udhëhequr nga Micky van de Ven, i cili bëri një ndërhyrje vendimtare në vijën fatale, mbajtën rezultatin të paprekur.

Kjo fitore i siguron Tottenham-it pjesëmarrjen në edicionin e ardhshëm të UEFA Champions League dhe në Superkupën e Evropës.

Për Manchester United, humbja në finalen e Bilbaos shënon fundin e një fushate të vështirë në Europa League dhe shton presionin mbi skuadrën, që aktualisht renditet në vendin e 16-të në Premier League.