Çifti nga Sllovenia që “po shëtit botën në këmbë” vjen në Shkodër

Me çanta shpine dhe veshje sportive, shumë prej nesh e kanë parë çiftin Ida dhe Marjan nga Sllovenia, të udhëtojnë në këmbë në zonat më të bukura të Shkodrës. Ne i takojmë në urën e Mesit, aty ku ishte destinacioni i tyre i radhës ndërsa na flasin për rrugëtimin e tyre të parë në Shqipëri dhe impresionet e deritanishme.

 “Është hera jonë e parë këtu. kemi vizituar Shkodrën, më vonë do shkojmë në Theth. Çdo rrugëtim e bëjmë sipas hartës, pasi ne nuk i njohim këto zona. Çdo zonë e kemi vizituar në këmbë, na ka marrë rreth 1 muaj kohë. E kemi nisur rrugëtimin nga Kukësi, më pas në Valbonë”,-tha Ida Oderlap Kranjc.                          

Ajo na tregon se aventurën e kanë vijuar edhe në Malin e Zi.

“Na pëlqen shumë kjo aventurë. Vitin e kaluar kemi vizituar Malin e Zi. Kemi përshkuar Zhabjakun, Gucinë dhe Plavën në këmbë. Destinacioni i radhës është Thethi. Tani jemi në Shqipëri, jemi ende në fillim të rrugëtimit ndaj nuk e dijmë si do shkojë”

Pavarësisht moshës, çifti slloven nuk e ka ndalur pasionin për të udhëtuar të gjithë botën.

“Kemi vizituar shumë vende të botës kur kemi qenë të rinj, tani që jemi pak më të thyer në moshë e kemi marrë më me qetësi dhe po na shijon ky stil jetese. Duhet ta pranojmë që për ne është e vështirë të udhëtojmë me këto bagazhe, por ja vlen”

Më pak komunikuam me Marjanin, udhëtarin e jetës për Idën, i cili me anglishten e tij modeste vlerësoi eksperiencën e tij në zonën e Shkodrës.

“Super eksperience. Me pëlqejnë malet këtu. ushqimi i mrekullueshem, por malet janë shume te bukura”

Ida dhe Marjan janë disa nga turistët e shumtë që vizitojnë Shkodrën në këtë periudhë të vitit. Mes aventurave të shumta, veçojnë udhëtimin në Shqipëri si më të veçantë.

LEXONI GJITHASHTU:

• “I duan me lëkurë gjarpri, krokodili ose struci”- Këpucari zbulon porositë e VIP-ave
• Pasioni për punën i 82-vjeçarit, këpucari më i vjetër në qarkun e Gjirokastrës