Nis zyrtarisht stërvitja shumëkombëshe “Defender Europe 2025”

Ka nisur zyrtarisht stërvitja shumëkombëshe “Defender Europe ‘25”, një nga ushtrimet ushtarake më të mëdha dhe më komplekse të dekadës së fundit në Evropë dhe Afrikë, nën udhëheqjen e Komandës Evropiane të Shteteve të Bashkuara (EUCOM), në bashkëpunim të ngushtë me vendet aleate dhe partnere të NATO-s.

Në orët e para të mëngjesit të sotëm, trupat e Forcës Tokësore shqiptare u nisën nga garnizoni i Zall-Herrit drejt Qendrës së Stërvitjes në Bizë, duke shënuar kështu fillimin e angazhimit aktiv të Shqipërisë në këtë stërvitje ndërkombëtare.

Shqipëria është një nga vendet pritëse kryesore të “Defender Europe ‘25” dhe luan një rol strategjik në garantimin e zhvillimit të suksesshëm të operacioneve të planifikuara. Qëllimi kryesor i këtij ushtrimi është rritja e ndërveprimit mes forcave aleate, forcimi i gatishmërisë ushtarake dhe aftësisë për të reaguar me shpejtësi ndaj çdo kërcënimi të mundshëm në hapësirën euroatlantike.

Ministria e Mbrojtjes dhe Forcat e Armatosura të Republikës së Shqipërisë mbeten të përkushtuara për të siguruar një mjedis operacional efikas dhe për të kontribuar në mbrojtjen kolektive, stabilitetin rajonal dhe paqen ndërkombëtare.

LEXONI GJITHASHTU:

• Brukseli miraton sot planin prej 150 miliardë eurosh për mbrojtjen e BE-së
• Gjermania dhe aleatët e saj nuk do të kufizojnë furnizimin me armë ndaj Kievit