Mblidhen ministrat e Jashtëm, në Bruksel diskutohet për zhvillimet më të fundit në Ballkanin Perëndimor

Ministrat e Punëve të Jashtme të Bashkimit Evropian mblidhen sot në Bruksel, ku krahas diskutimit të zhvillimeve ndërkombëtare Këshilli i Punëve të jashtme do të ndalet tek Ballkani Perëndimor, marrëdhëniet transatlantike dhe rolin e BE-së në rajon.

Siç vlerësohet nga qeveritë evropiane, është e rëndësishme që procesi i anëtarësimit për Shqipërinë dhe Maqedoninë së Veriut të vazhdojë. Temat aktuale të diskutimit do të përfshijnë, ndër të tjera edhe situatën në Bjellorusi, Rusi dhe Afganistan. Në orët e pasdites shefi i diplomacisë së Bashkimit Evropian Josep Borrell do të zhvillojë një konferencë për mediat. Pritet që në takimin e Ministrave të jashtëm të BE-së te flitet edhe për dialogun Kosovë-Serbi.

Ministrat gjithashtu pritet të kenë një shkëmbim pikëpamjesh mbi ndryshimin e klimës përmes një video-konference me të Dërguarin Special të SHBA për Klimën, John Kerry.

Ndërsa ditën e nesërme mblidhet  Këshilli i Përgjithshëm i Bashkimit Evropian ku pritet të diskutohet për procesin e zgjerimit dhe stabilizim-asocimit të unionit. Këshilli do të përgatitet për Këshillin e Posaçëm Evropian, që zhvillohet më 25 maj 2021.